أخر الأخبار
الرئيسية » تقارير » #امبابة_المتنورة ايه امبابة دى ؟!

#امبابة_المتنورة ايه امبابة دى ؟!

#امبابة_المتنورة
ايه امبابة دى ؟!

ولما حد يقولك انت منين فى الاصل وتقوله انا من امبابة .. ويرد ويقول ايه امبابة دى ؟!
رد عليه وقوله ..امبابة يعنى حدود مشتركة مع 3 محافظات مبابة يعنى بنى سلامة اقدم مستعمرة زراعية فى العالم يعنى كوبرى امبابة اقدم كبارى مصر يعنى مطار امبابة اقدم مطار قبل مطار القاهرة يعنى المطابع الاميرية والترسانة النهرية يعنى مصانع الصوف والكتان ..ومصنع الشوربجى والخزف والصينى . ويعنى مصنع الكراسي
..امبابة يعنى كورنيش النيل العوامات اللى مر عليها الملوك والرؤساء والفنانين الكبار يعنى جامع خالدبن الوليد وجامع ناصر يعنى كنايس كتيرة يعنى مسلم مسيحى رضعوا من ام واحدة
يعنى جزيرة امبابة اللى كانت محاطة بالنيل زي الزمالك كفر الشوام وتاج الدول والاوقاف والجزيرة وارض عزيز عزت وترعة السواحل وخلي بالك من الكلام
( .. يعنى عزبة عبدالنعيم.. عزبة الصعايدة 

( عمدة الزمالك)

والمنيرة يعنى سيدى اسماعيل وسيدى الشجيع وسيدى الهنيدى وسيدى المغربي .
..يعنى ميدان الترولى الشهير وشارع السلام والمحكمة ومساكن عمال مصر اللى زي الفيلل ..يعنى شارع طلعت حرب وشارع الطيار فكري وشارع الجامع وشارع الاقصر وزكى مطر وشارع الغيط وشارع الجامع موسكى امبابة يعنى سكة صوامع مصر ..يعنى ارض الجمعية وارض الحداد والعمارة بشتيل شارع المطار يعنى شارع الطنانى والمدبح وسوق الجمال ..يعنى اقدم سوق فى مصر كان بيتقابل فيه التجار من الشرق والغرب من خارج مصر وهو سوق الجمعة اللى اتلغى يعنى احلى وارخص سوق فاكهة وخضار فى مصر يعنى اول فرع لرزق بتاع الهريسة

امبابة يعنى مدرسة الحديثة وامبابة الجديدة مدرسة الجرن ومدرسة الوحدة العربية ومدرسة الاسماعيلية ومدرسة امبابة الثانوية ومدرسة التحرير ومدرسة ارض الحداد

يعنى تانى فرع للمالكى فى مصر وكان كشك… يعنى ناصر البرنس ..اللى اتظلم وطلع براءة
يعنى نادى الشباب والنادى النموذجى ونادى ناصر الاجتماعى اللى كانت بتضم فى قلبها نادى الزمالك والترسانة وطلعت حرب والتوفيقية وجزء كبير من المهندسين قبل التقسيم الادارى امبابة يعنى 5 مكتبات عامة
يعنى الشيخ الطبلاوى ومشايخ كتير ودعاة واعلاميين وفنانين منهم محمد هنيدى وحميد الشاعرى وعلى الحجارواخواته ولعيبة كورة منهم ابرهيم يوسف واخواته يعنى سينما الكيتكات الصيفى والشتوى وسينما محشى ومعدية بسيمة واسترا
يعنى معركة المماليك الكبرى مع الفرنسيس يعنى معسكرات الملك ادريس السنوسي لتدريب المقاتلين لطرد الايطاليين من ليبيا ..يعنى امبابة الى خدت السويسة فى حضنها فى التهجير واللى النوبيين سكنوها محبة فيها
يعنى احلى سنين عمرنا ..يعنى احلى اصحاب واشيك شباب في مصر الجدعنه علي حق مش اونطه

د/عمرو الدمرداش

اضف رد

لن يتم نشر البريد الإلكتروني . الحقول المطلوبة مشار لها بـ *

*