.

.

هويدا طارق تكتب: ياصبرك ياجرجاوى

هويدا طارق تكتب

ياصبرك ياجرجاوى

إعلامنا القديم كان مصور لنا إن الصعيد بخير وكله عال وتمام هى بس مشكلة التار، لكن غير كده كله زى الفل، وبما إن إعلامنا شكله لسه ماعتبش الصعيد..أحب أقول إن في ناس فى الصعيد بتموت علشان مش لاقيه حق الدوا، ولو أفترضنا توافر الدوا فين المستشفيات والعيادات اللى هتقول على الدوا..؟ ولو فى مستشفى دايما بيكون الدكتور مش موجود، ولو موجود وكشف على المريض، وأستدعى الأمر لعملية فورا مفيش غرفة عمليات فى الحالة دى بيضطر المريض الذهاب إلى البندر مسافة8 أو9 كيلو أيا كانت حالته سواء كانت زايدة أو لسعته عقربة أو مصاب بطلقات نارية، ولما يوصل مفيش دكتور برده..الحمد لله وصل الدكتور وصحى من أحلى نومة، وعمل العملية بعدها يترمى المريض على الأرض عشان مفيش غرفة متابعة يارب أحفظ الصعايدة وأحميهم وأغنيهم عن المستشفيات بس أزاى نغنيهم عن المدارس؟! ده حتى المدرس مش موجود عنده وردتين على الميكروباص هيخلصهم وجاى ولا الناظر اللى ممكن يسيب المدرسة، ويمشى لو جاله خبر إن الجاموسة بتاعته بعافية شوية،وعشان أقول الحق ساعات المدرس بيبقى موجود بس عامل دماغ..يعنى قلته أحسن!! خلاص يارب أغنى الصعايدة كلهم عشان يدخلوا أولادهم مدارس خاصة ،ويعتمدوا زينا على الدروس الخصوصية، وأغنيهم عن الحكومة
أما بقى مشكلة أنابيب الغاز فحدث ولا حرج يجى موظف التموين كده ربنا يحفظه لوالدته يبيع أسطوانات الغاز للتجار سوق سودا ب20 جنيه عشان تتباع للناس العادية ب70أو80 جنيه فى حين إن تمنها أصلا 5 جنيه
أما بقى صفيحة الجاز نفس الكلام بيضطروا يشتروها من التجار ب50 أو45 جنيه فى حين إن سعرها الحقيقى 22 جنيه، وبالتالى يضطر سواق الأجرة لمضاعفة سعر الأجرة وأهو كله بيحط على كله!!
نفس الكلام بيتكرر فى السماد الكيماوى مفيش سماد متوفر فى بنك التنمية والإئتمان الزراعى وسعره الحقيقى75 جنيه لكن بيضطروا يشتروه من التجار ب200 جنيه
عشان كده لما بنسمع عن مظاهرات فى الصعيد غالبيتها بتكون ضد مكتب التموين والوحدة المحلية، ولكنها ليست مظاهرات سياسية وده مش بيقلل من وطنيتهم أو مدى إنتمائهم لكن ربما يرجع السبب إلى أنهم غير مستفيدين من الحكومة فى أى شىء …مش فارق معاهم أى تغيير بالعكس ممكن يتأثروا بأى مشاكل تحصل فى أى بلد عربى بسبب سفر الشباب إلى الخارج فعلى سبيل المثال قرية المجابره” أجدع ناس” نجد 90% منها يشتغلون بالخارج إذ يصبح دخلها شهريا من الخارج مالايقل عن8مليون جنيه.
ربما إستفادوا الصعايدة من التغيير فى الإنفلات الأمنى!! يعنى التار اللى كان بايت بقاله 10 و15 سنة خلص اليومين دول مع تزايد الحشيش والسلاح والأفيون ،وإتاحة وتسهيل كل ماهو ممنوع وفى حالة اللجوء إلى الشرطة فى حل أى مشكلة بيتفضل الضابط بإخلاء مسئوليته تماما…..ياجماعة حلوها ودى!!
وعشان نقول الحق يذكر أن مصنع سكر فى جرجا، ولكنه الحمد لله قائم على أبناء العاملين و90% من موظفيه من قنا سبحان الله نفس بلد مدير المصنع100% صدفة!
لو هنتكلم فى المياه ومشاكلها كله فى السليم وعادى الميه ممكن تتقطع طول النهار، ولو أتصلت بالوحدة المحلية محدش بيرد ويذكر أن فى خزان فى قرية المجابرة ماشاء الله عمره حوالى 150 عام وفيه تشكيلة هايلة من الفران والصراصير والحمام الميت…فى كده؟!
وياسلام على الناس اللى حالفها الحظ وساكنة بقرب الترعة فيضطرهم الأمر إلى توصيل مواسير الصرف الصحى بالترعة…..يعنى اللى بيسقى الأرض لازم يسحب ميه من الترعة اللى ورد النيل مغطيها كلها وغالبا ممنوع تطهيرها!! واللى بيحصل إن الأهالى بيضطروا يدفعوا على حسابهم حق الحفار وبيلموا من بعض وطبعا بتواجههم مشكلة التخلص من الطمى اللى بيضطروا إلقاءه على الطرق!
ده غير إن قرى كتيرة جدا مفيهاش صرف صحى أساسا..!
وفى قرى كتيرة جدا لم يصل إليها رصف الطرق وحتى طرق السفر خالية من الإنارة عادى!!
حتى الجانب الترفيهى مفيش حديقة طفل ولا نوادى ولا حتى مكتبات ليه هما الصعايدة ملهمش نفس ولا إيه؟!
ده طبعا غير المشاكل اليومية العادية اللى بتدخل فى نطاق الواسطة والمحسوبية، وحتى العلاج على نفقة الدولة يتطلب صلة قرابة من أحد أعضاء مجلس الشعب وفى إيتام كتير ملهمش أى دخل يعيشوا منه وده كله عادى مش فى الصعيد بس
الكلام ده مش إفتراضات ولا إدعاءات عشان لو أى مسئول أنزعج من الكلام ده ياريت يكلف خاطره ويزور كام قرية كده من قرى سوهاج سواء الجابره أو القرعان أو بيت الخريبى أو بنى عيش أوالمحايدة القبلية أو البحرية ده لو وقته يسمح معلش!!
وكمان غريبة أوى رجال الأعمال اللى هما بيتفشخروا أوى دايما إن أصلهم من الصعيد ليه بيصعب عليهميستثمروا فى بلدهم؟! معلش بقى ياصعايدة أصل أنتوا عشان جدعان جوى لازم تتحملوا جوى
وكان الله فى العون وحسبى الله ونعم الوكيل!!!

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Optimization WordPress Plugins & Solutions by W3 EDGE