.

.

كواليس تهريب ” المارلبورو” فى قناة السويس

كواليس تهريب ” المارلبورو” فى قناة السويس

بشتغل فى شركة ملاحة دولية, وكنت معدي من قناة السويس النهاردة والمفروض ان الواحد يكون مبسوط وفخور ببلدي وبقناة السويس وهو معدي اهم ممر ملاحي في العالم مع طقم اجانب ولكن اللي حصل اني بقيت عمال اقول ياريتني ما عديت ولا اعدي من قناة السويس تاني خالص بسبب مرشدين هيئة قناة السويس الى مقدرش اقول عليهم غير حسبي الله و نعم الوكيل من رئيس الهيئة اللي سايب اشكال ضالة في القناة تسئ لكل مصرية ومصري..

أول مرشد طلع يدخل المركب من منطقة المخطاف الى اول القناة وهي منطقة قصيرة جدا يعني في حدود ساعة فقط ولما دخل المرشد اول ما طلع طلب من القبطان 6 خراطيش سجاير مارلبورو طبعا عشان هو مرشد.

قناة المارلبورو ده اسم القناة عالميا بسبب شوية رعاع القوات البحرية اللي الباشا مهاب مميش مسيبهم علينا ومحتلين مناصب وتخصصات مش بتعتهم بس عادي هنعتبرها زي كل حاجة في البلد المهم المرشد خد اللي هو عايزة ودي مش المشكلة انما المشكلة بقي لما اول مرشد سلمنا للسفاح مرشد القناة
سيادة الرتبة اللي عمري ما شوفت في حياتي نقص ولا بجاحه ولا سفالة ولا حقارة ولا كل الصفات القذرة متجمعة في شخص.

أول ما طلع سيادة الرتبة المرشد بدأ بالأسلوب الرخيص وهو بيتلكك للمركب على حاجات اصلا مش موجودة ولما لاقي المركب كله تمام الحمد لله, قال للكابتن انا عايز 17 خرطوشة سجاير مارلبورو عشان ميعملش مشاكل للمركب ويدفعها غرامة ويعطلها, يعني من الاخر اتاوة, المهم اتفقوا على 15 خرطوشة ودي برضو مش مشكلة دا الطبيعي بتاعهم والكابتن عارف ده ومحضر الخراطيش, انما بعد شوية سيادة الرتبة المرشد طلب ياميش رمضان وزعل قوي لما الكابتن قاله لسة مجبتش فقاله ازاي معندكش وانت عندك ضباط مصريين لا انت عندك وانا عايز ياميش رمضان علشان اخده للعيال فى البيت.
قام مطلع من جيبة عينة فسدق وعينة حبهان, والله العظيم جايب معاه حباية وحباية واداهم للكابتن وقاله انا عايز من دة للبيت.

بعد شوية طلب تين مجفف و طلب اللنش بتاع هيئة قناة السويس علشان يجي ياخد الغنيمة بتاعته اللي اتحصل عليهم ووصل اللنش اللى حيلم الغنايم, عشان ياخدها ويوديها للمرشد لحد البيت, واتفقوا انه هيحاسب اللي هيوصل الغنائم, فالسجاير محطوطة فى كيس قمامة كبير, يقوم سيادة الرتبة المرشد يعمل اية؟؟؟

فتح التلاجة بتاعة الكابتن الى في غرفة القيادة وقام مفضي اللي فيها في الكيس اللي فيه الغنائم, والله العظيم انا بقيت واقف عمال اقول يا ارض انشقي وابلعيني, لما ابقي واقف المصري الى في وسط زمايلي الى معايا اللي من سبع جنسيات مختلفة, والحقير سيادة الرتبة المرشد الجعان الى عمرة مشاف لحمه يعمل كدا, وعلى فكرة لو حد عارضه هو عنده صلاحية يوقف المركب ويحجز عليها ويدفعها غرامة لا تقل عن 20 الف دولار لأي سبب هو يقول للهيئة الفاسدة بتاعته هتصدقوه.

المهم قبل ما ينزل السجاير فا بيقول للقبطان اية رأيك أبيعلك السجاير؟!! المفروض السجاير دي اللى هو شاحتها من على المركب اللى واخدها اتاوة عايز يبيعها للكابتن تاني وياخد فلوس, المهم الكابتن وصل لمرحلة لا تسر تماما..

المهم نزلت السجاير بس السفاح لسة موجود
شوية وطلع كيس من الشنطة بتاعته وعايز شوية فاكهة للبيت…
وشوية وجاله العشا فا كان العشاء فيه رز بالخلطة والخلطة فيها مكسرات وشاف المكسرات وبدأ يتعصب عشان الكابتن قاله اننا معندناش مكسرات والرز طلع فيه مكسرات, المهم شوية وطلب حاجة ساقعة ياخدها معاة البيت, والاغرب كمان عايز ماية معدنية للبيت,

والله العظيم عمري ما شوفت فى حياتي احقر من الشخص دة, واللى بعد ما عمل كل دة قام يصلي ودى كانت الكارثة بالنسبالى علشان خلي الناس كلهم يقولوا هما دول المسلمين ؟؟!!

لعنة الله عليك يا سيادة الرتبة المرشد
علشان حضرتكوا تعرفو حاجة,, المركب دافعة رسوم عبور القناة حوالي 350 الف دولار غير شوية مصاريف تدخل فى 20 الف دولار, يعني هيئة غنية بس جايبة شوية سفاحين مسيباهم يفضحوا مصر

اسف على الاطالة بس حبيت انقل صورة من صور الفساد اللى فى البلد

عن البحار أمين وهب

 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Optimization WordPress Plugins & Solutions by W3 EDGE