الرئيسية / مقالات وآراء / هويدا طارق تكتب:عليه العوض في اعلامك يا مصر

هويدا طارق تكتب:عليه العوض في اعلامك يا مصر

هويدا طارق تكتب:عليه العوض في اعلامك يا مصر

طول عمري اعرف ان البني ادم بيختار لعبه و يلعبها عادي و اللعبه مالهاش انها توافق او ترفض لانها جماد و ربنا مانعمش عليها بنعمة العقل كل الموضوع انها عندها زراير بنضغط عليها و هي تنفذ و كمان يا بنكسب يا بنخسر لكن الابحاث اثبتت علي مر العصور واختلاف الرؤساء انه عادي جدا ممكن شعب كامل يتلعب بيه عادي رغم انه عنده عقل وللاسف مش اي عقل بس بيوافق انه يتلعب بيه رغم انه دايما بيطلع خسران !!!
عن انتخابات الرئاسة اتحدث ، انا مش ضد حد ولا مع حد لكن ضد التوجيه المضلل …. لما فجأه قبل الانتخابات كل القنوات بلا استثناء تتكلم عن الانجازات المبالغ فيها لسيادة الرئيس و يا ريتها انجازات ملموسه يستفيد منها المواطن بعد ٧ سنين عناء ما بين ثوره و انقلاب و رئيس مخلوع و معزول و رابعه و الصراعات دي كلها … لكن كلها بتتكلم عن كم المليارات المدفوعه في مشروع ……ايا كان و الكباري و العشوائيات ميعرفوش اننا بندعي علي الحكومه كل ما نسمع كم المليارات دي عشان كلها من جيوبنا سواء عن طريق فاتورة الكهرباء اللي كل شهر يضاف لها ضرايب جديده او عن طريق البنزين اللي هيوصل ل ٦ جنيه في يوليو القادم او عن طريق كل السلع اللي زادت الضعف حتي الخضار و الفاكهه اللي المفروض بنزرعهم عشان طبعا زي ما كلنا عارفين ان مجرد ما البنزين بيغلي خلاص بنشحت بعدها

تعالوا نكمل الانجازات العظيمه الطريفه بقي :
بيقولك تمكنت اجهزة الداخليه من ضبط تشكيل عصابي بحوزته ٤ مليون و ٨٥٤ الف جنيه و مليون و ٤٣ الف يورو و مليون و ٥٠٣ الف دولار ، حد يسالني هي العصابه دي سرقوا بنك ؟ اصل المبالغ دي مش منطقي ابدا تتسرق غير من بنك ، قالك لا اصل العصابه كانت بتستهدف الاماكن و ال compounds الجديده …. امممممم قولتلي ، طب هو الناس اللي ساكنه في الاماكن الغاليه دي معقول معندهاش ثقافة انها تشيل فلوسها في البنك او انشالله حتي في البوسطه ؟

رغم ان سبحان الله العصابه هي اللي واعيه و شايله جزء كبير بره مصر غير اللي تم ضبطه
ماشي انا مستعده احاول اقنع نفسي بكل ده املا مني و ثقه في حنكة اجهزة الداخليه لكن الامل راح مجرد ما اتصلوا يهنوا مدير المباحث الجنائية سيادة العميد نبيل سالم علي الهاتف تخيلوا قبضوا ازاي بقي علي العصابه ؟؟؟!!!
بيقولك عن طريق تتبع كاميرات المراقبه اللي هو بنفسه لما جابوا التسجيل قال ان المجرم مكانش واضح اصلا و لما ضغطت عليه الاستاذه لميس الحديدي قال لا ماهو في واحد فيهم جزمته وقعت منه و هي دي كانت الدليل !!!

لا وقفه هنا بقي : قالك وصلنا للمحل اللي اتباعت منه الجزمه دي و عن طريق المحل وصلنا لصاحبها
_انا عندي هنا ٩٠ سؤال تقريبا ، هو انهي جزمه لمؤاخذه لو شوفناها نقدر نعرف هي منين ، وانهي بايع ده اللي هيعرفنا بالزبون هو احنا بنفتح حساب و احنا بنشتري الجزم ؟ و بعدين انا واحده من الناس ممكن يبقي عندي جزمه بلبسها جايباها من سنتين فاتو هل لو ضاعت مني فرده هيوصلوا للبياع اللي باعهالي اللي هو مثلا فاتح في بورسعيد و انا عايشه في القاهره وكمان البياع هيوصلهم ليا ؟!
عشان ماكونش متحامله علي حد هو ممكن ده كله يحصل في حالة ان البياع فتح المحل اول يوم و انا كنت اول و اخر زبون و باعهالي و قفل المحل بس بالصدفه البحته فتحه تاني لما الظابط راحله بالفرده الضايعه لكن ده في حالة ان الجزم اللي بنلبسها مكتوب علي النعل عنوان المحل في اماكن سريه احنا مبنشوفهاش و الداخليه بس هي اللي بتشوفها
كان ممكن سيادة العميد نبيل يسهل عليا كل التساؤلات دي و يقول ان الموبايل مثلا هو اللي وقع من احد المجرمين و عن طريقه تم العثور عليهم لكن ليه يحيرني كده ؟!
الغريب ان الاستاذه لميس الحديدي انبهرت انبهار منبهر و اشادت بحنكة و براعة اجهزةالداخليه !!!

و بعد ما انبهرت و اشادت و باركت و هنت نزلت بفاصل ثم جاءت بالفقره التاليه : جمعت ٤ او ٥ أرامل و ناقشت معاهم قضيه غايه في الاهميه و هي معاناة الارامل في المجلس الحزبي و في نهاية الفقره توجهت برساله للمسؤلين عن تعديل القانون بالنسبه للوصايه علي القصر و طبعا كلنا عارفين ان النداء ده هيتم الاستجابه ليه فورا او مثلا قبل الإنتخابات مثلا ب ٣ او ٤ ايام مش بعيد تكون اصلا الفقره اتعملت مخصوص عشان في نهايتها نوجه النداء للمسؤلين عشان لما تحصل الاستجابه ننبهر انبهار منبهر برده زي الاستاذه لميس في الفقره اللي فاتت رغم ان القضيه دي موجوده من عشرات السنين و عانت منها الكثير من الامهات بعد  وفاة الزوج !
افتحوا الفضائيات و هتلاقوا كله بيوجه لكن بطرق مختلفه منهم اللي عارف اننا مش هبل فبيتعامل بطريقه غير مباشره زي الاستاذه لميس و جوزها اللي كان اول واحد بيذيعلنا خبر الفريق شفيق و انه مش ناوي يرشح نفسه طبعا زي ما توقعنا كلنا ، وفي اللي بيعاملنا معاملة الاطفال زي الاستاذ العبقري احمد موسي ده بقي عالمي هقول فيه ايه ولا ايه ده حتي الفيديو بتاعه في باريس كان عالمي برده

السؤال دلوقتي هما ليه مش مقتنعين اننا فعلا بقينا نتجاهل البرامج دي بسبب عدم مصداقيتها .. ليه لما كنا بنحب برنامج “البرنامج” حرمونا منه مدي الحياه فين باسم يوسف لو الحكومه بتراعي الديموقراطيه في الاعلام و الهري ده كله فين باسم يوسف علي الاقل كان بيضحكنا بدل الضغط و النكد اللي بقينا عايشين فيه هو يعني كان بيناقش حاجات منعرفهاش مثلا ؟ !! كل اللي كان بيتكلم فيه احنا عارفينه كويس كل الحكايه انه لما كان بيقول الاحداث بأسلوبه الساخر كان بيضحكنا بدل ما بندعي و نحسبن زي ما بيحصل و احنا بنتفرج علي البرامج اللي سايبنهالنا دي
فين ابو تريكه، ابو تريكه اللي فرح مصر كلها مش اهلي ولا زمالك ولا مصري ولا بورسعيدي لا ده مصر كلها بتحب ابو تريكه
لا ابو تريكه وحش عشان اخوان و هيأثر علينا للدرجه دي احنا هبل في نظر الحكومه ؟؟!!!
طب ازاي هو مش احنا المصريين اللي عزلنا مرسي ؟ وانا لسه قايله فوق ان ابو تريكه فرح المصريين كلها ، مش معني ان لاعب كره بنحبه عنده ميول معينه يبقي لازم هيفسد اخلاقنا … بيفكروني بنفسي وانا بتعامل مع ابني اللي عنده ٣ سنين لما يشوف طفل سلوكه مش عاجبني بقطعه عنه تماما بس ده ابني و انا بربيه و عنده ٣ سنين و مبيفهمش حاجه هي دي نظرتكوا لينا ؟!

لما اتحاد الفيفا لكرة القدم يعمل استفتاء عن احسن لاعب مصري و يضم هذا الأستفتاء بعض الأسماء التي شاركت في المباريات التاريخيه زي الخطيب و حسام حسن و محمد صلاح و محمد ابو تريكه ، و بكرر الفيفا مش مركز شباب الحبانيه و تكون نتيجة الاستفتاء هي فوز امير القلوب محمد ابو تريكه قوم ييجي المذيع العالمي موسي يقولك اصلهم اي حد ضد ربنا هينصروه و إن ده هربان و متفرغ للريال القطري و ان ده دعم من الاخوان عشان يكسب و يطلعلك لسانه و ان الهدف من ده كله ضرب محمد صلاح ، انت مين يا عم الحج و بتتغذي علي اي نوع من الاعشاب ؟ ما تتفرج كده علي نفسك و تشوف كلامك عن محمد صلاح قبل ما يتبرع ب ٥ مليون لتحيا مصر كنت بتقول عنه ايه و سبحان الله بعد ما اتبرع بيهم قلت عنه ايه انت مفقوس اوي حاول تحبكها شويه شكلك بقي وحش اوي عيب

فوز محمد ابو تريكه كان هيتعد من الإنجازات النادره الملموسه بدل اللي عمالين تعدوها علينا كل يوم كإنكوا بتعايرونا بيها

و يا ريتنا شايفنها اصلا !!

علي فكره انتو لو رجعتولنا باسم يوسف و ابو تريكه و امثالهم من الموقوفين والممنوعين هنحبكوا اوي و مش هتحتاجوا كل المجهود اللي بتبذلوه في تلقين الاعلاميين الباقيين و عفا الله عما سلف عشان احنا شعب طيب اوي
انا بكرر تاني انا مش مع حد ولا ضد حد ولا ضد تيار سياسي معين ولا معاه انا ضد الاستخفاف بالعقول و التوجيه سواء التوجيه الاعلامي المباشر او الغير مباشر لان الإعلام وظيفته الإعلام مش التوجيه ، انتوا كإعلاميين بتتفضلوا مشكورين تعرفونا ايه اللي بيحصل من غير أفوره ولا انحياز و شكرا و احنا عندنا عقولنا اللي هتميز و تقرر لكن شغل ماما حلوه ده عيب اوي و كفايه استخفاف و توجيه اكتر من كده متقفلوش علينا كمان الفضائيات كفايه التليفزيون المصري العظيم و إنجازاته من أيام الثوره ، لو عملنا حصر للناس اللي لسه بتتفرج علي التليفزيون المصرى هنلاقيهم مكملوش صوابع الايد الواحده و كمان هنلاقيهم بيتفرجوا علي نايل كوميدي او نايل دراما مش الاخبار مثلا ولا البرامج لا سمح الله ، و زي ما كلنا عارفين سواء نزلنا او مانزلناش مبروك الف مبروك للرئيس السيسي و اهي بشرة خير
و في النهايه اتوجه بجزيل الشكر لزملائي اللي وافقوا علي نشر هذا المقال و لو ان ده هيكون فيه احتمال كبير لاغلاق الجريده و بالتالي اعتقالي اكيد فلنكتفي بهذا القدر عشان عندي عيال عايزه اربيها و شكرا جزيلا .

Howidatarek@hotmail

عن Mostafa Mohamed

صحفى شاب عضو نقابة الصحفيين جدول المشتغلين رئيس تحرير جريدة بتوقيت مصر مواليد 7 يوليو 1983

اضف رد

لن يتم نشر البريد الإلكتروني . الحقول المطلوبة مشار لها بـ *

*