.

.

عملاق النكتة المصرية الفنان يحيى فريد يفتح قلبه لنا: المال والجهل السبب فى إنحدار الذوق العام

 

عملاق النكتة المصرية الفنان يحيى فريد يفتح قلبه لنا: المال والجهل السبب فى إنحدار الذوق العام

الحوجه السبب فى فيام الثورات

 

حوار :صابرين عزيز 

 

 

 

   البداية كانت إزاى إحكيلنا ؟

أنا من مواليد بولاق أبو العلا وكنت وأنا صغير غاوى تقليد الفنانين الكبار فى البيت وفى الشارع وفى المدرسة وفى حفلات الجيران سواء أفراح أو أعياد ميلاد وكنت بحب أقلد أستاذ اللغة العربية عندنا فى المدرسة وكان شديد جدا وكان بيرتدى جبة وقفطان وكان أول ما تخلص حصته ويخرج من الفصل أقوم بتقليده وزمايلى يصقفولى ويضحكوا قووووى لحد ما فى يوم كنت بقلد عمتى فى البيت وأبويا رحمة الله عليه شافنى وضحك وطلب منى أول ما تيجى عمتى أقلدها قدمها ولما جت فعلا قلدتها وكانت المفاجئة أنها لم تعضب بالعكس ضحكت وأعطتنى كمان تعريفة هدية

كيف تم إكتشافك ؟

كنت فى فرح واحد جارنا وطلعت أغنى منلوج والناس كانت مبسوطة وبالصدفة شافنى متعهد وقالى أنا عايزك بكرة تيجيلى شارع محمد على قولتله ليه قالى عندى شغل ليك كنت مقلق ومش عايز أروح بس ربنا هدانى وروحت وكنت صغير وقابلت الأستاذ عضمة وكان متعهد وخدنى ودانى فرح وطلعت وقلدت الجيزاوى والناس ضحكت وبعد ما خلص الفرح لقيت المتعهد بيدينى خمسين قرش فرحت قوووى وطلعت أجرى على أمى وأحكيلها وإديتها ربع جنيه فطبعا قالت لأبويا وما كان منه إلا أنه رفض وبعد محايلة وافق يخلينى أروح الفرح الجديد بس بشرط عمى يروح معايا وكان المتعهد طالب منى أن ألبس بدلة المكان شيك وكده وكنت لسه برضه صغير فلبست بدلة والدى وكانت واسعة عليا قووووى وروحت الفرح ولما طلعت عشان فقرتى حصلت مفاجئة إتفك حزام البنطلون ووقع البنطلون منى قدام الناس والناس تضحك هما كانوا مفكرين دى فقرة من ضمن الضحك والحمد لله عدت وبدأت العجلة تمشى حفلة ورا حفلة وأنا كنت أكبر إخواتى فكنت بدرس وبحيى حفلات وكمان بساعد والدى لأن كان موظف ومرتبه على قده وكان أهم حاجة عندى إنى أحافظ على سمعتى وشكلى وإحترامى لنفسى عشان إخواتى البنات لو عملت أى شئ غلط يضر سمعتى مين اللى هيفكر يتجوز إخواتى فكان لازم أكون قدوة ومثلا لإخوتى وأخواتى والحمد لله جوزتهم بفضل الله

إيه المعوقات اللى وقفت قدامك ؟  

أولاد المهنة بدأوا يحاربونى بشدة لدرجة أنا أذكر إنهم كانوا بيخلوا متعهدين يطلبونى ويحددوا معيا ميعاد لحفلة وأروح ملاقيش حاجة شوفتى وصل غيظهم منى لإيه

مين اللى وقف معاك ودعمك ؟ 

فاروق حداد وكان متعهد والفنان شفيق جلال

مين كان مثلك الأعلى فى الفكاهة والنكتة ؟          

حمادة سلطان وفكرى الجيزاوى

ماذا أضفت للنكتة  فى مصر ؟    

حاولت أقدم لون جديد وهو تمثيل المونولوج والنكتة فكان تعبير الوجه مع النكتة يزيد من ضحك الناس

من كان صديقك على مدار تاريخك ؟   

المطرب فوزى سلام

ذكرياتك مع الزمن الجميل؟

مرة كنت فى حفلة وكان فيها الفنان محمود شكوكو وأول ما شافنى قالى (إيه الواد ده ده حلو قووى )                                  والمرة الثانية كان الفنان إسماعيل يس تقابلنا فى حفلة وكان كبر وكانت أول مرة نتقابل وشافنى وسمعنى ونزلت أسلم عليه فقالى (إنت بجد حلو إنت إسماعيل يس رقم 2 ) ومكنتش مصدق أكبر نجوم فى مصر وقتها قالولى كده ياااااااااااااااه كنت فرحان قوووى دول نجوم كبار الحمد لله يارب إنى قدرت أوصلهم الإعجاب ده

إيه أول مونولوج قدمته ؟ 

مونولوج إسمع بص لمحمد الديجوى وكان عاملى أغنية خاصة بيا بتقول

( عايز تبقى سعيد عيش لحظات مع يحيى فريد  )

ما معنى النكتة ؟          

هى ضحكة من القلب بتوقف العقل عن التفكير للحظة وبتلهى الناس عن الغم وبتحول لفرحة وأمل لبكرة وصبر شوفتوا هى حلوة إزاى

من هو مثلك الأعلى ؟           

سيد الملاح

من الذى يضحكك من الجيل الحالى ؟   

مفيش حد خالص

ماذا تعنى الضحكة بالنسبة للفنان يحيى فريد ؟ 

تعنى المونولوجست رمضان و أحمد الحداد وإسماعيل ياسين ومحمود شكوكو

تفتكر مين السبب فى إنحدار الذوق العام ؟    

الفلوس والجهل هما السبب

 

هل عانيت فى حياتك ؟    

يااااااااااااااااااااااااه كتير قووووى أنا شوفت الناس بكل الألوان أنا كنت بحمل مسؤليات كتير قوووى وكان كل همى زواج إخوتى بعد رحيل والدى وكنت راعى لكل أسرتى حتى البعيد منهم وكنت ودود بأصدقائى وأصحابى والأن لم أجد أحد يسأل عليا والله ده زمن الناس فيه بالألوان

من الذى يبكيك ويحزنك ؟  

لو رأيت أحد يتألم أو لو رأيت إنسان محتاج فى الشارع أو حتى شوفت مشهد مؤثر فى التليفزيون

أيهما أفضل بالنسبة لك الحفلات داخل مصر أم خارجها ؟ 

لا فى مصر طبعا أنا زورت الخليج كله وكمان زرت فرنسا وإنجلترا وروحت مهرجان الفكاهة فى تونس وكان معايا فكرى الجيزاوى

مين الملحنين الذين لحنوا لك ؟

يعقوب منسى ومحمد الديجوى  ويسرى محمد بفرقة رضا

ومين الكتاب الذين كتبوا لك الكلمات  ؟     

نبيل مهدى ويسرى محمد

قولنا موقف حصل معاك فى دول الخليج مثلا ؟ 

أيوه أفتكر يوم ما وقفت فى حفلة أمام الشيخ زايد رحمه الله وبعد ما خلصت الفقرة قالى إنت سلطان النكتة وعطانى 200 دولار فى وقتها رغم إنى كنت متفق على 50 جنيه

ما هو رأيك الجيل الماضى ولا الحالى ؟ 

الموهبة هى الأساس

هل هناك نقابة للمونولجست ؟   

لا مفيش غير نقابة الموسيقين

وهل إستفدت منها ؟         

لا طبعا والله يكون فى عون هانى شاكر التيار شديد والذوق العام إنحدر وكله بيغنى وكله بيقول نكتة

إيه رأيك فى الثوارت الماضية ؟ 

الحوجة صعبة قووووى وده السبب

ميولك الريا ضية ؟             

كنت بلعب كرة سلة فى نادى السكة لحد سن 25

ماذا تقول لشباب مصر ؟

إعملوا اللى بتفهموا فيه

نصيحة لجيل الفن الجديد ؟  

أقول لهم إنتم جيل مهبب وصناع السينما الحاليين عايزين يدخلو السجن لأنهم بيدمرو ولادنا وبناتنا وقيمنا وأخلاقنا ولا دى السينما المصرية ولا نيلة الممثل والممثلة المصريين كانوا زمان بيقدموا فن وقيمة ومعنى عيب وإتقوا ربنا فى ولادنا

وبتقول إيه للشعب المصرى ؟  

قاطعوا الأفلام دى اللى فيها عرى وسفالة وبلطجة وإنحدار أخلاق عشان إنتم اللى بتديهم الفرصة يزيدوا ويتمادون وبيحثوا بدخولك الأفلام دى إنهم ناجحين وإنتم راضين

وأخيرا طلبنا من الفنان القدير يحيى فريد يقولنا مونولوج فقال أزمات أزمات أزمات فى بلدنا كتير أزمات واللى بيتسبب فيها خلق وغاويين حركات

كلمة أخيرة تقولها لمين ؟    

قال أقولها لمصر تحيا مصر تحيا مصر تحيا مصر

 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Optimization WordPress Plugins & Solutions by W3 EDGE