أخر الأخبار
الرئيسية » مقالات وآراء » مصطفى محمد يكتب : أنا أغنى واحد فى العالم

مصطفى محمد يكتب : أنا أغنى واحد فى العالم

من وأنا صغير دايما بقول إنى  أنا أغنى واحد فى العالم  ..تبقى غلطان لو بتحسب الغنى بالمال ولا بالنفوذ ..الغنى بحب الناس أيوه الناس هما السند والمدد هما الثروة الحقيقية ..النهارده 7 يوليو عيد ميلادى وبما إنى شخص معنوى جدا فطبيعى جدا أكون مبهور لما تجيلى تهانى من ناس أعرفهم من وأنا عندى أربع سنين .. لازم أبقى فى قمة سعادتى لما تيجلى تهانى من كل الناس اللى قابلتهم فى حياتى.. كل مكان روحته وكل مكان زورته وكل مكان عديت عليه مفيش أروع من إنك تلاقى إن أصدقاء دراستك وجيرانك وتلاميذك وأساتذتك فاكرينك ..حب الناس هو الرزق الحقيقى..من يتحملونك بكل تقلباتك ويحرصون على صحبتك ووجودك فى حياتهم هم فقط من يستحقون أن يكون لهم مكان فى حياتك.. اللى بيراهن على الناس دايما كسبان

السنة اللى فاتت كنت بأسس جريدة “بتوقيت مصر” وكنت قاعد أخطط وأدرس أزاى أقدر أعمل شكل يعبر عن قناعاتى وعن اللى أنا درسته لأنى من وأنا فى سنة أولى صحافة بحلم أعمل جورنال يكون كله عن الناس .. يغوص داخل حياتهم وقصصهم الإنسانية حتى أن مشروع تخرجى كان مجلة إسمها “الناس”  المهم قررت أنا والشباب معى من فريق العمل أن ننطلق فى الشارع من أجل عمل قصص إنسانية  وقصدنى شخص معاق فى إمبابة لعرض قصته فرحبت على الفور  المهم أننى قررت النزول إلى إمبابة لعمل مجموعة من القصص الإنسانية فظن ” الديلرز” أننى جئت بالشباب لفضح نشاطهم فى تجارة المخدرات فإتصل مرشد بالقسم فجاء معاون المباحث كريم العباس ومعه أمينى الشرطة من القسم أحدهما يدعى أشرف سعفان وهو يعيش على الإسبوعيات التى يحصل عليها من الديلرز بالإضافة إلى رصيده الذى وصل إلى 6 ملايين فى البنك والسيدة التى تعمل بالأداب التى تزوجها وتوفت منذ بضعة أعوام وثلاث سيارات أوبر وكريم يملكهم وأمين الشرطة الأخر هو أحمد رمزى الذى يملك شقة على البحر يديرها فى الدعارة المهم حدث جدل بينى وبين معاون المباحث

معاون المباحث” كريم العباس”: إنت بتعمل أيه

أنا: أنا بعمل قصص إنسانية

معاون المباحث” كريم العباس” بإستهزاء : يعنى أيه؟!

أنا: بسمع الناس وبعرض مشاكلهم

معاون المباحث” كريم العباس” : هو أنت وظيفتك كده..هتجيبلهم تكيفات يعنى

أنا  نظرت له بغضب: أنا وظيفتى إنى أعرض مشاكلهم لكن الحقيقة مش وظيفتى إن أجيبلهم تكيفات

معاون المباحث” كريم العباس” : عموما فى قانون طوارىء وإنت شغلك كده مش قانونى وأنا هأطلع بيكم دلوقتى على الأمن الوطنى

أنا: أوك بس من فضلك هأتصل بمحامى النقابة عندى

معاون المباحث ” كريم العباس” : هنطلع الأول على قسم إمبابة

أنا: أوك معنديش مشكلة بس بردو هأتصل بمحامى النقابة

معاون المباحث” كريم العباس” : إنت بتجادل كتير ليه

أنا : ولا بجادل ولا حاجة هو حضرتك عايز أيه بالظبط

معاون المباحث” كريم العباس”: ورينى الفيديوهات اللى انتم صورتوها

بعد ما شافها: وكمان الناس بتتكلم عن إرتفاع الأسعار

أنا: أومال حضرتك عايز الناس تتكلم عن أيه

معاون المباحث” كريم العباس” : أحنا هنمسح الفيديوهات دى

أنا: أوك إمسحها

تانى يوم رجعت الفيديوهات دى ببرامج ” فى برامج بترجع الحاجات اللى اتمسحت” وكتبت شكوى لإدارة التفتيش فى وزارة الداخلية وحكيت اللى حصل معاون المباحث إتنقل أسوان ” إتلاقيه بيتحمص ياعينى فى الجو ده”  وفى شهر أكتوبر نزلت العدد الورقى الأول من جريدة بتوقيت مصر وفيه كل القصص اللى معاون المباحث مسحها .. القصة دى علمتنى حاجات كتير يعنى مثلا كنت بكتب بوستات بحكى فيها عن الواقعة  .. ومرة كنت بهزر مع أصحابى على الفيس ويوم الواقعة بالليل أتريقت وقولت لهم أنا رايح قسم إمبابة بكره والنبى متتاخروش عليا عشان الناس دى ايدها تقيلة  كنت فعلا بهزر لأن ماكنش فى معايا حاجة فيها ادانة ليا ومكانش فى سبب إنى أروح أصلا ..الطريف فى الموضوع فى ناس صدقت واستعرت منى وبعدوا أولادهم واخواتهم عنى أفتكرونى روحت القسم بجد ومتراقب وفى الوقت ده كنت على وشك إنى أخد قرار مصيرى فى حياتى الشخصية لكن عدت حساباتى لأن ربنا نور بصيرتى وكشف لى حقيقة ناس كنت مخدوع فيهم  ماهو مفيش أصعب من إنك تراهن على حد وتدافع عنه قدام العالم كله وميطلعش عند حسن ظنك  ..عندما تقف أمام العالم بأسره أعوام عديدة مدافعا بشراسة عن أحدهم ويأتى هو ويثبت لك صحة أراء الناس فيه أشكره لأنه أفسح المجال لغيره ممن يستحق أن يحظى بدفاعك الشرس لا تدافع عن من لا يستحق لا تتمسك بقضية خاسرة شكرا للناس التي تخرب مكانتها بنفسها

كلمة أخيرة

إختار البنت اللى تستحق تشيل أسمك .. اللى تستحق تبقى أم أولادك .. اللى تخليك فخور بيها فى أدق تصرفاتها 

مش اللى كل ماتشوفها تقول أعوذ بالله من الخبث والخبائث 

mostafa.mohamed218@yahoo.com

اضف رد

لن يتم نشر البريد الإلكتروني . الحقول المطلوبة مشار لها بـ *

*