.

.

مصطفى محمد يكتب : إنت تانى

1 min read

مصطفى محمد يكتب : إنت تانى

كلام فى سرك وإوعى تقول لحد النائب إيهاب الخولى عضو مجلس النواب فى إمبابة ..اللى فى الأساس محامى ولف فى أحزاب كتير من أول الوفد مرورا بالغد والمحافظين وأخيرا أستقر فى حزب مستقبل وطن بيخالف القانون أزاى أنا أقولك أزاى إنت دلوقتى سيبت حزب المحافظين وروحت حزب مستقبل وطن إنت حر بس هل حضرتك مشيت بشكل قانونى يعنى مر على إستقالتك 6 شهور وحزب المحافظين بلغ المجلس لأ يبقى عضويتك باطلة فى المجلس لأنك لما غيرت صفتك الحزبية لم تلتزم بالقانون المادة 110 من الدستور   و  المادة 6 من اللائحة الداخلية للمجلس بس تعرف إنت عضويتك باطلة بالنسبة لى من ساعة ما خالفت إتفاقنا اللى هو خلتنى كمواطن من إمبابة أنزل انتخبك بناءا على برنامج إنتخابى لم تلتزم بيه وبالتالى فقدت شرعيتك بالنسبة لى بس ملحوقة الإنتخابات السنة اللى جاية مش هانتخبك تانى..لما كتبت عنك قبل كده جاتللى تهديدات عشان ابطل اكتب عنك معرفش بقى إنت عندك علم بيها ولا مش عندك فى كل الأحوال أنا مش هأبطل أنتقد  أداء أى حد  أنا شايفه إنه مخزى والعمر واحد والرب واحد وعايزك تعرف حاجة إن لما جاتللى تهديدات قعدت أضحك تيقنت أد أيه إن اللى هددونى مرعوبين عشان صوت الحق عالى الغريب يا أخى إنى لما إتكلمت والناس عرفت اللى ليها و اللى عليها بقى أى حد يتكلم وينتقد بقيت أنا اللى محرضه ده أنا جامد أوى بقى ياعزيزى الناس دول فى دائرتك الإنتخابية نزلوا رشحوا جناب سيادتك فالحد الأدنى من حقوقهم إنهم يسألوا ويستفسروا ويفهموا والراجل اللى انتخبوه ينفذ وعوده ليهم وسواء كنت على علم بالتهديدات اللى بتوصلنى لما بنتقد أدائك أو مش على علم أنا مش بخاف غير من اللى خالقنى واللى عنده حاجة يعملها أنا قاعد مستنى أهو

 

النهارده عيد ميلاد أبويا أنضف راجل فى الدنيا وأخر الرجال المحترمين ..الراجل اللى أدق تصرف إتصرفه فى حياته خلانى فخور بيه ..ربنا يديك الصحة

 

كلمة أخيرة

إذا لم تستح فإصنع ماشئت

 مرة أخرى وليست أخيرة لا تحاول أن تتحدى شخص وزنه كله عزيمة و إرادة  شخص يا إما بيكسب يا إما بيكسب  وإذا كان و لابد بيكسب هتخسر ..هتخسر .. لاتحاول أن تتحدانى .. اللهم بلغت اللهم فأشهد

mostafa.mohamed218@yahoo.com

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Optimization WordPress Plugins & Solutions by W3 EDGE