.

.

مصطفى محمد يكتب: تجار الحروب

1 min read

مصطفى محمد يكتب: تجار الحروب

مع كامل إحترامى لأصحاب الإنتماءات السياسية بس طول عمرى بستغرب جدا من فكرة إن ده ناصرى وده ساداتى وده من أنصار مبارك وده مرساوى وده سيساوى .. أنا لا من أنصار مرسى ولا من مجاذيب السيسى وفى الأساس مش بحب أعمم بس خلينى أقولك إن الشعب المصرى هوائى جدا .بيصنعوا تماثيل للحكام وبعد كده بيدوهم بالجزمة ..أنا قدرى من أنا صغير أبقى على يسار أى حاكم ولما كبرت واشتغلت صحفى ترسخت قناعتى أكتر بإن البلد دى مجاش حد حكمها يستحقها كل اللى حكموها جنوا عليها أنصار الحكام دول أنواع طيبين أو منتفعين أوجهلاء ..أخطرهم طبعا المنتفعين بتوع عاش الملك .. مات الملك ..دايما بتيجى على بالى مشاهد المعلم فى القهوة فى روايات الفتوات بتاعة نجيب محفوظ .. الفتوة اللى يقع يشيل صورته ويحط صورة الفتوة الجديد ..إنت دلوقتى مبتعرفش تتفاهم مع حد ..أحسن وسيلة بعملها إن طول الوقت بحط نفسى مكان الطرف التانى بس النتيجة الحتمية اللى بوصلها لما بسأل نفسى السؤال التقليدى أيه اللى يخلى فلان يدافع عن حد بالرغم من إن فساده ظاهر أوى ومكشوف لو حب وإنتماء يبقى حاجة تحترم لكن لو منفعة ..إنت بأى حال من الأحوال لما بتكشف فساد حاكم أو مسئول قطاع كبير من أنصاره بيكرهوك إما عشان إنهم شايفينه مبيغلطش أو لأنك فى نظرهم بتوقعه وبالتالى النحتايه هتبوظ  طب بالذمة  أيه اللى يزعلهم فى كده ماهما كده كده لما يقع ده هيجروا على الجديد ويهللوا أو ممكن يفتكروك بتغير منهم ونفسك تبقى مكانهم لأ ياعم بابا قاللى متشتغلش طرطور  ..بفتكر طول الوقت الفنان الراحل محمد الشويحى فى مسلسل ” المال والبنون” لما كان بيغنى كلماته الشهيرة لسلامه فراويله” الفنان يوسف شعبان” ..” ادعوا لعم الحاج بطولة العمر الله يخليه ” ..كل واحد بيختار دوره فى الحياة  فى الطبيعى أنا عارف مكانى على يسار أى حاكم لو التيار الإسلامى فى الحكم ..الحاكم هيجيب الحاشية بتاعته ولو الحاكم عسكرى برضه هيجيب الحاشية بتاعته ولو الحاكم  من التيار المدنى هيجيب حاشيته ولو من شباب الثورة هيجيب حاشيته وبرضه حاشيته معروفة والحمد لله إنى لا من حاشية هذا ولا ذاك

كلمة أخيرة 

أنا بطبيعتى مبحبش قولنا وقالوا بس فيه حاجات كده بتهلك من الضحك فى الأونة الأخيرة حد جه يسخنى على حد تانى وقاللى فلان ده شتم عليك وقال هو بيتكلم فى الموضوع  ده ليه ..بصفته أيه ..ضحكت وقولت له  صحيح بصفتى أيه ده أنا  صحفى وده شغلى أيه اللى دخلنى فى الموضوع بقى  لقانى مسخنتش قاللى أصله قال عليك  صحفى على كده هو ليه علاقة  بالصحافة  ضحكت تانى وقولت لأ ماليش علاقة أنا بس معايا بكالوريس إعلام قسم صحافة وعضو نقابة الصحفيين جدول المشتغلين ..المهم لقيته مش عارف يسخنى قولت له التسخين ميبقاش كده التسخين يبقى إنك تقوللى هو بيتكلم عليك كده ليه هو أيه علاقته هو بالصحافة غير إن أصحابه بيقولوا عليه صحفى لكن هو لا صحفى ولا هباب ده بيكتب فى جورنال أصفر  بيتوزع فى الإتوبيسات وأخر مؤهل حصل عليه دبلوم الصنايع واتحداك لو طلع لك شهادة فيها مؤهل أكبر من الدبلوم  ياعم وأنا هأطلع للناس شهادتى وهو يطلع للناس شهادته لقيته ضحك وقاللى ومراته الأخيرة روحت قاطعته وقولت له غشيم الكلام يبقى على مراته اللى قبلها والوليه اللى كان عامل معاها  علاقة فى الحرام ..مراته الأخيرة دى عبيطة ده  محدش عدى من شارعها غير لما لاغاها وهى واقفة فى البلكونة  ..ضحك وقاللى ده أنت أستاذ ضحكت وقولت له لما تبقى عاوز تسخن حد تعالى وأنا أعلمك طبعا أنا كنت بهزر ساعات بتبقى محتاج تقرص ودان حد  وتعرفه إن الشر مفيش أسهل منه بس إنت مش فاضى وعندك أولويات ورتم حياتك أسرع من الوقوف للرد على التافهين  

عزيزى أنا لم أسبك ..أنا وصفتك ولكن الحقيقة بتزعل 

mostafa.mohamed218@yahoo.com

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Optimization WordPress Plugins & Solutions by W3 EDGE