أخر الأخبار
الرئيسية » عاجل » مصطفى محمد يكتب: بينى وبينك أيه

مصطفى محمد يكتب: بينى وبينك أيه

مصطفى محمد يكتب: بينى وبينك أيه

سامعك بتغنيللى للعندليب وبتقوللى ” بينى وبينك أيه ياريت تقوللى عليه شغلت بالي ليه بيني وبينك إيه ليه ليه شغلت بالي  ليه” كلمات مأمون الشناوى ألحان كمال الطويل..أنا هأقولك ياسيدى بينى وبينك أيه .. بينى وبينك جيم حلو ..أنا شايف نفسى شجاع ومستاء جدا من فسادك ومن طريقة دهسك لضحاياك عايز تلاميذى اللى بدرس لهم صحافة اللى شايفنى نموذج كويس ثقتهم بنفسهم تزيد لما يشوفونى مكمل هو أنا مقولتش لسيادتك إنى بشترط فى الطلبة اللى بدرس لهم إنهم يتسموا بالشجاعة فعيب أوى يشوفونى مش شجاع  وإنت بتراهن على جبروتك وإنك هتدهسنى زى اللى قبلى وأنا بقولك أعلى ما فى خيلك إركبه أنا قاعد مستنيك هيحصل أيه يعنى هأموت.. الناس كلها دلوقتى بقت عارفة مين أخر واحد هددنى وسبب تهديده ليا اللى هو عشان خايف لأكشف فساده ..بينى وبينك أيه هأكون طمعان فى الكرسى بتاعك .. إسكت هو محدش قالك إنى أنا كده بوضعى الحالى أقوى منك ..أنا حر نفسى يابيه لكن إنت بتسدد الفواتير الإنتخابية ..هأكون عاوز أبقى عضو فى الحزب اللى إنت فيه والله إتعرض عليا واعتذرت لأنى صحفى والصحفى المفروض يبقى حيادى وميبقاش ليه إنتماءات سياسية  أه فكرتنى والنبى أبقى رد على الأخ اللى بيمدح فيك وبيقول إنك نائب قبل الحزب مش بتخاف من الأمين العام والأمين العام المساعد قول له إنك دخلت الحزب مخصوص عشان تنجح فى الدورة اللى جايه وعرفه إنك لو نزلت مستقل وجربت متشتريش أصوات هتطلع بفضيحة ..بينى وبينك أيه أنا صاحب صاحبى وبنسب الحق لأهله لكن إنت عاوز تطير ناس من زملائك فى الدائرة لحساب مصالحك الشخصية زملائك دول اللى إنت نسبت أعمالهم لنفسك ..بينى وبينك أيه أنا معنديش حاجة اقدمها للناس وبفضل ربنا الناس بتحبنى و بتصدقنى إنت اللمة الكدابة اللى حواليك دى عشان الحصانة جرب كده تسقط فى الإنتخابات وبطل تمول الجرايد اللى إنت بتمولها أصحاب الدبلومات اللى بيكتبوا فيها لما تقفل محدش هيشمهم لأنهم مبيعرفوش يكتبوا كلمتين على بعض وإنت محدش هيعبرك تانى ..أنا عايز أساعدك تخلص عليا ..طب أزاى هتلفق لى تهمة هتقول إنى إخوانى  هتطلع كداب لأن كل المظاهرات اللى نزلت ضد الإخوان كنت أنا فى مقدمة الصفوف وأنا كنت ضدهم من قبل ما مرسى يحكم وفى فترة حكم مرسى كتبت 77 مقال انتقد سياساته المتخلفة وبطش الإخوان وكنت فى أحداث الإتحادية وشوفت الزميل الشهيد الحسينى أبو ضيف وهو بيستشهد طب ماتجرب تفتش فى تاريخى من زمان شوية أسأل عنى فى حضانة الوسيمى فى وراق العرب هتلاقينى كنت الطالب المثالى طب أقولك روح أسأل عنى فى مدرسة إمبابة الجديدة هتلاقينى كنت طالب مثالى أسأل  أستاذ سيد على مدرس اللغة العربية ربنا يديله الصحة وشوف هيقولك أيه  طب أسأل عنى فى مدرسة إمبابة الإسماعيلية وإمبابة الثانوية هيقولوا لك كان فى حاله ومركز مع نفسه وفى الثانوية العامة جبت 89.9% جاتللى أداب إعلام عين شمس ووالدى طلب منى أدخل أكاديمية أخبار اليوم قسم صحافة أقولك أسأل ولاد وبنات دفعتى .. معلش أنا حاولت أساعدك لكن عفوا لقد نفذ رصيدكم ..معلش كان بودى أترعب منك بس إنت ممكن تخلينى أموت فى حالة واحدة .. إنى أموت من الضحك يا أخى ده كفاية كمية الناس اللى بتدعيلى لما عرفت إنى وقفت لك .. أييييييه  أمم والله لأ شعبيتك جارفة صحيح لدرجة إن محدش طايقك..دليل على الخيبة إنى أنا واقف لك لوحدى وإنت عمال تفكر إنت والأسطول اللى معاك ومفيش فايدة ياعينى صعبان عليا

كلمة أخيرة

ربنا مايحرمك منى

mostafa.mohamed218@yahoo.com

اضف رد

لن يتم نشر البريد الإلكتروني . الحقول المطلوبة مشار لها بـ *

*