أخر الأخبار
الرئيسية » تقارير » “جافريلو برينسيب”.أخطر رجل في العالم” الحقيقى

“جافريلو برينسيب”.أخطر رجل في العالم” الحقيقى

الفيلم المصري “أخطر رجل في العالم” بتاع فؤاد المهندس اللي أنتج عام 1967، لو فكرنا نحوله لواقع، مش هنلاقي أحسن من “جافريلو برينسيب”.
الأستاذ جافريلو ما شاء الله لوحده كده تسبب في مقتل 17 مليون بني آدم وإصابة 20 مليون تانيين، وأنهى 4 إمبراطوريات، بعد ما اغتال ولي عهد الإمبراطورية النمساوية، وزوجته، واللي كان سبب في إندلاع الحرب العالمية الأولى.
الاغتيال مكنش أكتر من عود الكبريت اللي اترمى في مخزن بنزين مليان مشاكل سياسية عمرها 27 عام بين ألمانيا والنمسا والمجر من جهة، وروسيا وفرنسا وصربيا وبريطانيا من جهة تانية.
المهم يعني… خلينا في الأخ جافريلو.
جافريلو أصلا من مملكة صربيا (حاليا ممكن نعتبره من البوسنة والهرسك)، اتولد في كوخ في قرية أولياج، أمه “مارجيا” كان عندها الحتة بتاع “الشعب المتدين بطبعه”، سمته جافريلو على اسم قسيس علشان مايموتش زي اخواته الـ 6.
الحاج بيتر والد جافريلو علشان يحسّن دخله، مع شغل الفلاحة اشتغل في توصيل الجوابات والطرود، ممكن تقوله إنه مكنش فاضي يربي ابنه، ده غير إنه كان رافض يعلمه أصلا، وياريته أصر على رأيه.
في النهاية جافريلو درس في المرحلة الابتدائية، وأكتر حاجة اتشد ليها هي الشعر الملحمي الصربي، اللي زرعت فيه القومية وخلته يعمل عملته السودة بهدف توحيد كل الأراضي الصربية.
جافريلو علشان يحقق حلمه حاول ينضم لتنظيمات سرية مسلحة كتير، زي “الاتحاد أو الموت” & “البوسنة الشابة” & “القبضة السوداء”، لكن كان بيتم رفض طلبه لأنه قصير وبنيته الجسمانية ضعيفة، وفي النهاية انضم لمنظمة “القبضة السوداء”.
بالمناسبة، والشيء بالشيء يذكر، في مصر اتكونت حركة بنفس الاسم لمحاربة الاحتلال الإنجليزي عام 1919، واللي اغتالت فعليا عدد من كبار المسئولين والضباط الإنجليز، وجايز من أشهرها اغتيال رئيس الحكومة علي يوسف باشا وهبة.
كمان شعار الحركة هو نفسه الشعار الشهير اللي اقتبسته حركة 6 أبريل بعد تأسيسها عام 2008.
في النهاية يعني بحكي الكلام ده علشان نؤكد على معلومة “احترس من كل من اقترب من الأرض”، لأنه ممكن يعمل بلاوي

مصطفى الطوبجى

اضف رد

لن يتم نشر البريد الإلكتروني . الحقول المطلوبة مشار لها بـ *

*