أخر الأخبار
الرئيسية » تقارير » ماذا حدث للفيس بوك؟!

ماذا حدث للفيس بوك؟!

حسابات تم اختراقها، وحسابات مفبركة، وحسابات أصحابها ماتوا، دي أسباب مشكلة الفيسبوك باختصار، وهنعرف التعامل تم إزاي.
علشان “مارك” يحل المشكلة ويخلص من الكم المهول من الطلبات والملفات والتقارير، شكّل فريق عمل مهمته يتواصل مع كل أكونت (وتخيلوا العدد المهول بقى)، ويتأكد هو أكونت يخص شخص حقيقي ولا لأ، حاجة كده تشبه اللي معمول في الصين.
“مدام عطيات” نظرا لأنها مدير عام الأرشيف، ترأست اللجنة دي، واللي ضمّت كمان رئيس قسم المستخرجات، رئيس قسم الموارد، رئيس قسم العاملين، رئيس قسم الاستحقاقات، رئيس قسم المطبوعات، رئيس قسم الشئون الفنية، رئيس قسم المتابعة، ورئيس قسم الأمن.
اللجنة دي انبثقت عنها لجان فرعية تانية، علشان لو مستخدم عنده شكوى، أو محتاج يعدّل بياناته، أو في تشابه أسماء، أو أي أسباب طارئة تانية ممكن تظهر.
نهار أحد أيام شهر سبتمبر
مستخدم :- لو سمحت أنا الفيس بتاعي خرج لوحده، وطلب مني الباسوورد
مدام عطيات :- ده تأمين علشان مصلحتك أولا، اكتب الباسوردة القديمة عادي
مستخدم :- باسوردة!! ما طبعا أنا حاولت قبل ما أجيلك، بس برضه مش عاوز يدخل
مدام عطيات :- يبقى تطلع للأستاذ حسين في الرابع
….. (بعد 25 دقيقة)
الأستاذ حسين :- هاتلي طلب موقع من اتنين مستخدمين عندهم على الأقل 7000 فولورز، مثبوت فيه إنك صاحب الأكونت.
….. (بعد 3 أيام)
الأستاذ حسين :- اختمه بقى بختم النسر من عند مدام نعمت في الثاني
…… (بعد 13 دقيقة)
مدام نعمت :- فين صورة بطاقتك!!! انزل صورها من المكتبة اللي ورانا
….. (بعد 20 دقيقة)
مدام نعمت :- هاتلي بقى دوسيه ورق
مستخدم :- وده منين؟!
مدام نعمت :- من المكتبة اللي ورانا
….. (بعد 20 دقيقة)
مدام نعمت :- تمام كده، اطلع بالطلب بقى لأستاذة ألفت في السابع
….. (بعد 7 دقائق)
أستاذة ألفت :- هات يا سيدي، تمام… تمام… هنراجع بقى الورق ده ونرد عليك، مش ده رقمك؟!
مستخدم :- مش الورق كله سليم وجاهز!!!
أستاذة ألفت :- إش ضمنا يا حبيبي إن البيانات اللي في الورق سليمة
….. (بعد شهر)
مستخدم :- لو سمحت أنا جايب الورق بتاعي بقاله شهر، ومحدش اتصل بيا، وأنا شغلي متعطل
أستاذة ألفت :- لسة بنتأكد من البيانات، لو مستعجل قدّم طلب استعجال عند أستاذ وحيد تحت.
….. (بعد 25 دقيقة)
أستاذ وحيد :- طلب!! وماله!! كل سنة وانت طيب
مستخدم :- وحضرتك طيب
أستاذ وحيد :- يا بيه صحصح كده معايا، كل سنة وانت طيييببب
مستخدم :- آه.. معلش مش مركز، اتفضل
أستاذ وحيد :- أسبوع بالكتير وطلبك هيبقى بيتمضي عند مدام عطيات
….. (بعد 3 شهور)
مستخدم :- يا مدام عطيات أنا بقالي 3 شهور دايخ على الورق بتاعي، طوابع وجبت، دوسيه وجبت، طلب استعجال وقدمته مرتين، رش ورشيت، أعمل ايه تاني!!!!
مدام عطيات :- اتكلم عدل يا أستاذ، إحنا مش شغالين عندك، في غيرك برضه اللي بنخلص له الورق بتاعه، ولو على الشغل خلصه واتزساب ولاسيكبي ولا أي حاجة تانية، ولا هو علشان “همسة حنان” ماعندهاش غير أكونت الفيس يعني.
مستخدم :- ده انتوا بقالكم 3 شهور بتفروا في الأكونت بقى!!! وغيري ورقه خلص في ساعتين
مدام عطيات :- ملكش دعوة بحد
مستخدم :- مليش دعوة بمين يا #^@‰& يا عالم بنت £¢%% يا مكاتب كل اللي فيها ¶÷±×¥% يا <«»>*~^•| يا ولاد الـ@#×&±¤‰% مش عاوز أم الأكونت، هاشترك على تويتر
مدام عطيات :- يبقى تطلع عند أستاذ حازم في الخامس وقدم له طلب توتير.

مصطفى الطوبجى

اضف رد

لن يتم نشر البريد الإلكتروني . الحقول المطلوبة مشار لها بـ *

*