أخر الأخبار
الرئيسية » خدمة الواتس أب 01012507973 » ما يحدث في مدارسنا إرهاب أم بلطجة

ما يحدث في مدارسنا إرهاب أم بلطجة

استمراراً لملف التعليم الذى بدأنا لمتابعة سلبيات المدارس في مصر سواء خاصة أو اميرى ننشر استغاثة جديدة من أوليا الأمور إلى السيد الوزير.
مدارس_نرمين_اسماعيل
نصيحه لكل اللي حيقدم في مدارس جديد : بلاش مدارس نرمين اسماعيل ارجوك…… خاف على ولادك
ملحوظه انا مش حقدر أذكر اسمي او اسامي ولادي في البوست ده عشان الأسباب اللي حتعرفوها من الكلام الجاي.
السنه اللي فاتت كان لينا مشاكل كتير بخصوص موضوع الباصات مع مدرسة نيرمين اسماعيل فرع الشروق ملخصها أن الأسعار كانت غاليه جدا مقارنة بباقي المدارس زائد ان دورة الباص كانت طويلة جدا لدرجة أن فيه اولاد كانو ممكن يوصلوا البيت الساعه 6 بعد المغرب ولما حاولنا نتفاهم مع المدرسة في القصه ديه كان الرد هوا دة النظام و اللي مش عاجبه يسيب الباص لكن مش هنزود عدد الباصات ولا حنقلل في مدة الدوره. بعض مننا وانا منهم سيبنا الباصات و شوفنا حلول مؤقته السنه اللي فاتت لحد ما السنه تخلص .
السنه ديه كمان المدرسة زودت الأسعار تاني فبقت ارقام مخيفة ( توصل 14000 للطالب الواحد ) خاصة للي عنده أكتر من طفل فناس كتير ما اشتركتش في الباصات لأنه فعلا بقى خارج حدود قدراتهم الماليه تماما واولياء الأمور اتفقوا مع شركة سياحه توفر باصات / ميكروباصات مكيفة وفيها مشرفين توصل ولادنا للمدرسة بأقل من نص السعر تقريبا وكمان وقت الدورة نزل للنص فكان حل مريح لينا من كل النواحي وكل حاجه كانت ماشية كويس.
طبعا المدرسة لاقت ان جزء كبير من المكاسب الخياليه اللي كانت عامله حسابها تجيبها من بيزنس الباصات راح عليها وباصات المدرسة بقت فاضيه فقعدوا يفكروا ازاي يخلوا الناس ترجع تشترك غصب عنها وبالأسعار الغالية ديه فطلعوا قرار ان من يوم 7 اكتوبر غير مسموح للطلاب انهم يجو او يمشو بباص خاص وجمعو ولادنا على جنب و هددوهم أن اللي حيجي بباص خاص مش حندخله المدرسه وحنسيبه في الشارع بره كانهم طلاب درحه تانيه وكلموا اولياء الامور وبعتو رسايل علي سايت المدرسه وورقه مطبوعه وان الطلاب لغايه سن تانيه ابتدائي مش مسموح غير لولي الامر استلام الطالب والا حيفضل محبوس في المدرسه ومش حيطلع منها غير لما يجي ولي أمره يستلمه بنفسه واللي سنه اكبر ممكن يخرج بره المدرسه ويركب براحته والحجه اللي بتتقال ورا القرار العظيم ده ان منظر باصات السياحه غير لائق باسم مدارس نرمين اسماعيل .
اتجمع اولياء الامور ورحنا المدرسة امبارح و موصلناش لاي حل غير ان المدرسه تكرمت وحنت علينا انها هتقلل سعر الباص شوية وتعمل خصم للطفل التالت ( طبعا الأسعار اللي قالوها لا زالت تقريبا ضعف اللي بندفعه لشركة السياحه ) واللي هيجيب مننا عربيه بسواق لولاده فمسموح اسره واحده في كل عربيه يعني لو واخد حد معاك تاني في العربيه ممنوع !!! وكانه امر بديهي ان الأسر كلها عندها سواقين !!
فمن الاخر هما حصروا اولياء الامور بين باص المدرسه او سواق خاص لكل اسره او مع الف سلامه اخبط دماغك في الحيط .
وبالفعل نفذوا تهدديهم الأسبوع ده وحبسو الأولاد اللي مشتركين في الباصات الخاصه جوه المدرسه ومنعوا خروجهم الا الساعه 3 وربع بعد ما كل المدرسه خرجت وقالولهم الباص يقف بعيد بره بارك المدرسه اللي هوا اصلا شارع عمومي ملك للحكومه والمدرسه بتركن فيه باصاتها وشاغلين الشارع غصب لكن مش مهم الباص يركن بعيد والاطفال يمشو مسافه وممكن حد منهم يتعرض لحادث في سبيل ان بيزنس الباصات يرجع يشتغل …….. قمة البلطجه والأبتزاز باستخدام ولادنا كرهينه عشان يضغطوا علينا. اسمه ايه لما اطفال في الحر ده يتحبسوا ورا بوابه !! دا اسمه تعذيب نفسي قبل مايكون جسدي من المدرسه اللي المفروض تبقى تربويه ومؤتمنه على ولادنا .
المشكله الأكبر ان كان في شكل واضح من التهديد والوعيد ان اللي هيفكر ينشر حاجه علي السوشيال ميديا او يصور ولاده أو حيشتكي هيبقى اولاده بره المدرسه ده غير انهم بيستقصدوا الأطفال اللي اولياء امورهم بيشتكو او يتكلمو على السوشيال ميديا وبيتم الضغط عليهم في المدرسة بطريقة بشعه لتحطيم نفسيتهم والضغط على اهلهم وللأسف عرفنا ان كان في حالات سابقه السنه اللي فاتت والأطفال ساعتها وصلوهم لقمة السوء ….. عشان كده انا مضطره ما أقولش اسمي عشان خايفه على ولادي من البهدلة.
أحنا اشتكينا للوزارة لكن عرفنا للأسف أن ابن السيدة نرمين اسماعيل بقى مسشار لوزير التعليم فا مش عارفين اذا كان الموضوع حيتاخد بحياديه في الوزارة ولا كما هو متوقع من بعض أولياء الأمور ان مفيش حد حيقدر يعملهم حاجه. ،نامل ان ربنا يخيب ظنهم وشكوكنا وان الموضوع يتم التعامل فيه بحياديه من قبل الوزارة.
عشان كد احنا مضطرين ننشر الموضوع على السوشيال ميديا علشان ده ممكن يحرك الأمور ويحمي ولادنا من التنكيل بيهم ويخلي المدرسة تبطل بلطجه علينا لحد ما ربنا يخلصنا منهم على خير

مصطفى بن سلام

اضف رد

لن يتم نشر البريد الإلكتروني . الحقول المطلوبة مشار لها بـ *

*