أخر الأخبار
الرئيسية » ثقافة » مسرحية “إنقسام “
كورس الصحافة

مسرحية “إنقسام “

مسرحية “إنقسام “

تأليف مصطفى محمد

 

الفصل الأول

المشهد الأول

 

يدخل الصحفى صبرى كامل ويتحدث

أنا صبرى كامل صحفى بحب أكتب قصص إنسانية يمكن عشان بحب الناس ..مبحبش أعمم بس الناس بقت متعبة بقوا بيختلفوا على كل حاجة و أى حاجة  صوت عالى

ياجمهور البيب بيب

طب يلا يابوابين

يضحك كامل ويقول: أهو  ثم يعود ويجلس على كرسى

يدخل مجموعتين مجموعة تحمل أعلام الأهلى ومجموعة تحمل أعلام الزمالك

عصام : يلا يابتوع الساعات الروليكس

سامح: أحنا برضه اللى سمينا المبنى الإجتماع بإسمه

عصام: ياعم روح أنتوا بطولاتكم كلها حرام

سامح : ده قصر ديل عشان دولابكم مفيهوش بطولات

يتشاجر الطرفين

كامل يقف وسطهم ويصرخ بصوت عالى : بسسسسسسسسس يلا ياعم الحاج وانت وهو من هنا

يخرجوا ويدخل وليد يغنى وبعد أن ينتهى

 يدخل الشيخ فتوح ويصرخ بصوت عالى: أستغفرالله العظيم

 يافاسق يازنديق

وليد: أنا فاسق وزنديق  مش أحسن ما أعمل زيك وأركب الأتوبيسات عشان اتلزق فى البنات والستات

الشيخ فتوح: أنا ياوله روح يا إبنى ربنا يسامحك أنا هأدعيلك

وليد ففى فرح : صحيح يامولانا

الشيخ فتوح : طبعا يا إبنى روح يا إبنى ربنا ياخدك

يتشاجرا

يقف كامل بينهما ويبعدهما  ويصرخ : بسسسسسس

 

الفصل الأول

المشهد الثانى

 

تجلس المعلمة جمالات صاحبة المقهى  ويقف أمامها  حمو صبى المقهى ويجلس كامل 

حمو: يامعلمة  ماهو مش هينفع كده هو في قهوة مفيهاش شيشة

جمالات بصوت عالى أنا قولت 100 مرة القهوة مش هحط شيشة دى وصية جوزى المعلم متولى الله يرحمه …ماهى اللى متتسماش دى اللى موتته

حمو: يامعلمة الله يرحمه ..الحى ابقى من الميت

جمالات: ياواد هو انت ناقصك حاجة ما انت بتاخد حقك على داير مليم

حمو: يامعلمة أنا مش عليا .. القهوة بتخسر

جمالات: ياض إنت مالك ..المعلم متولى وصانى مقفلش القهوة مهما حصل

حمو: اللى إنت شايفاه يامعلمة

يسير ويتمتم بصوت واطى ” والله ماهينفع كده ”

يخضه الشيخ فتوح ويصرخ بصوت عالى : أستغفر الله العظيم

تخرج توته إبنة جمالات  فتنده عليها جمالات : رايحه فين يامعدلة وأيه اللى إنت لابساه ده

توته: أيه يا مامى

تعوج جمالات فمها : مامى مين يا أدى العدى

توته بغضب :حرام عليكى ياشيخة بقى حاولت اغيرك كتير وانتى مفيش فايده عمرك ما اهتمتى بيا ولا سألتينى مالك ماتشوفى انتى بتقعدى اد ايه فى البيت واد ايه بره  وتتركها وتجرى

تجرى وراها جمالات : بت ياتوته أستنى يابت

كامل صبرى يضرب كف على كف :  مفيش فايده

يصرخ الشيخ فتوح : أستغفر الله العظيم

كامل : ياشيخ اتلهى انت لأخر

 

الفصل الأول

المشهد الثالث

 

يسير كامل صبرى يقف محمد مشرط  وحسن أزازه حوله .. بنى ولا أبيض يابرنس ويقول كلا منهما  اشترى منى أنا يابرنس يابرنس يابرنس يضحك كامل يقول حتى المخدرات فيها اختلاف ياصلاة النبى

يصرخ الشيخ فتوح الجالس فى اقصى كرسى فى المقهى : أستغفر الله العظيم

يدفع كامل ازازه ومشرط ويقول لهما وسع لى انت وهو يابرنس ويجلس على كرسى بجوار الشيخ فتوح وينظر للشيخ فتوح ويصرخ فى وشه : أستغفر الله العظيم

يصرخ فى وجهه الشيخ فتوح : مددد دددددددد

يدخل فوزى العايق وينده بصوت عالى: يامشرط يا أزازه إنت يازفت إنت وهو  ثم يقف أمامهما جرى أيه يابرنس إنت وهو الإيراد بيقل ليه  انا مشغل معايا ناس خيخه اما كونتوش تشتغلوا كويس والله لا أبلغ عنكم

يصرخ فتوح: أستغفر الله العظيم

ينظر فوزى العايق للشيخ فتوح : وده أيه ده لأخر

فتوح : إخرس يافاسق

يجرى فوزى ليضرب فتوح يخرج حمو على صوت المشاجرة

يصرخ فتوح الشرطة أين الشرطة سأبلغ الشرطة عنك

 ياتاجر الإستروكس

يضحك فوزى: هالله هالله هالله إنت عرفت الإستروكس ياشيخ الغفلة

فتوح: إخرس ياتاجر البنى والأبيض

فوزى : بنى وأبيض ده أنت ليلتك سودا

حمو لفتوح : ماخلاص يامولانا هأجيبل حاجة تروق دمك

فتوح هاتللى زنجبيل ياولد ياحمو

حمو: ولد ياحمو ..يضربه على كتفه هات لنفسك تتعالى الأصوات

يصرخ كامل  بسسسسسسسسسس

 

الفصل الثانى

المشهد الأول

المقهى

تجلس جمالات تنصح فى ابنتها توته ويقف بينهما حمو

جمالات: يا بنتى أنا ست شقيانه هو انا لما ببقى ف الشارع ببقى بصيع مش يابنتى بخلى بالى من القهوة اللى ابوكى الله يرحمه سبهالنا

توته: ياماما ماتبيعى القهوة ونحط الفلوس فى البنك بدل البهدلة

حمو : طب وأنا أروح فين

تنظر له جمالات ثم تنظر لتوته : مينفعش يابنتى أبوكى موصينى

تقف توته بغضب وتتركها : يوه ه ه ه

تنده عليها جمالات ياتوته ياتوته 

 يتحدث شابان سوريان

عمار: بشار بطل

أحمد: بشارخاين هوالسبب فى اللى وصلنا له

عمار: أمريكا والخونة تأمروا عليه

أحمد: يقف ويحكى قصته

يجلس ازازه ومشرط يتحدثان مشرط     أنا تعبت مش عارف الدنيا هتفضل ملطشه  معانا لحد إمتى                                            

                                                      

حسن يتنهد   مش  قادر أنام من كتر الكوابيس ..يعود بظهره    للوراء أمتى هستريح لما مرات أبويا كانت بتعذبنى وتتبل عليا وتخلى أبويا يضربنى  قولت لما هأقتلها 

                                                 

                                                

 

محمد                                            مش إنت بس اللى الدنيا حاطه عليك  أنا كمان  من

                                              ساعة ما وعيت على الدنيا وأنا شايل الهم ..كنت

                                               بسرق عشان أأكل إخواتى ولما دخلت الإصلاحية

                                            شوفت أسود أيام حياتى

حسن                                   وربنا هربنا من الإصلاحية وإشتغلنا مع بدرية

                                       بقينا نبيع حشيش وكيميا ..مش عارف الدنيا

                                    هتفضل حاطه علينا لحد أمتى

محمد                                 مش عارف

ينظران إلى بعضهما

وينظران إلى الأرض

يصيح الشيخ فتوح : أستغفر الله العظيم بطريقة تخض كامل الجالس بجواره

يضحك كامل ويقول له : الله يحرقك                           

 

 

الفصل الثانى

المشهد الثانى

 

تخرج ندى وميادة ويتحدثان

ندى: شايفة  الناس طيبين أد أيه

ميادة : ولا طيبين ولا حاجة دول عشوائيين

ندى : حرام عليكى دول غلابة

ميادة : دول بلطجية وخطر على المجتمع

ندى: إنت عاملة زى الحكومة تقعد تبنى فى مساكن عشوائية وتلم فيها الفقراء وتحبطهم لحد مايطلع الكبت اللى عندهم وينحرفوا وتقول  عليهم بص دول ارهابيين

ميادة: إنتى هتعلقى فشلهم ع الحكومة مش  كفاية إنها بتلمهم من الشارع

ندى: طب بس بس

ميادة: إنتى عاملة أيه مع خطيبك

ندى : أهو بنكافح وبندور على شقة

ميادة:ياه ه ه أنا إن مكانش عريس غنى ميملاش عينايا

ندى: الغنى غنى النفس

ميادة: ياشيخة اتلهى

تعودان وتجلسان فى الخلف

تدخل جمالات وتجلس وتنده على حمو: وله ياحمو

حمو: نعم يامعلمة

جمالات:هاتللى شاى

يدخل كامل صبرى  تنده عليه جمالات: يا أستاذ  كامل والنبى

كامل: نعم يامعلمة

جمالات: والنبى يا أخويا كنت عايزاك ف موضوع

كامل يجلس بجوارها : تحت أمرك يامعلمة

جمالات: هو أنا بعمل حاجة غلط يا أخويا

كامل: بالعكس إنتى بنت بلد وجدعة 

جمالات: أومال البت توته بتستعر منى ليه  تصور يا أخويا مش عاوزه تورينى لأصحابها

كامل: معلش لاحظى إن سنها صغير بس إنتى ممكن تخليها تبقى فخورة بيكى

جمالات : أزاى والنبى يا أخويا

كامل: بإنك تطورى من نفسك وتتعلمى القراءة والكتابة

جمالات: هو ينفع

كامل: ينفع طبعا .. المهم إنتى عايزه تتعلمى

جمالات: ياريت

كامل: خلاص أنا هأعلمك

جمالات: ربنا يخليك

يدخل مشرط وأزازه

ويجلسان

 مشرط:هنعمل ايه المعلم فوزى خارج من الحبس النهارده وهنرجع  نبيع تانى

أزازه: ماتيجى نهرب

مشرط: يلا بينا

أزازه: بس هنروح على فين

مشرط: أى حتة بس نخلص

أزازه: نشرب حاجة ونتكل على الله

مشرط: يانهار أسود المعلم فوزى جاى علينا

يدخل فوزى ويسحب كرسى ويجلس جمب مشرط وازازه ويسند ظهره

فوزى: أسمع يامشرط إنت وأزازه أنا قررت إنى أتوب .. أنا زمان كان عندى ورشة ميكانيكا وهأرجع افتحها تانى لو عاوزين تبقوا معايا هأرضايكم

مشرط وازازه فى نفس واحد : معاك يامعلم

 

 

الفصل الثانى

المشهد الثالث

تجلس ندى يدخل عليها وليد مسرعا

وليد: ندى ..ندى  مبروك ياحبيبتى أنا لاقيت الشقة

ندى: صحيح ياحبيبى .. هنشوفها أمتى

وليد: بكره لو حبيبتى

يغنى وليد

يدخل فتوح عليهما بصوت عالى : أستغفر الله العظيم

يجلس الثلاثة

يدخل كامل ومعه أحمد  وعمار السوريان ويجلس الثلاثة فى المقهى

كامل : أنا هأعمل عنكما  قصة إنسانية  أنا عاوز أعرف إحساسكم بعد الرحلة الطويلة دى

أحمد بتأثر: مصر بلد جميلة كتير وأنتم ناس طيبين واحنا طول عمرنا شعب واحد لكن حب الوطن شىء تانى مهما كنت مبسوط هنا ومهما كانت المعاملة جوايا جرح كبيروحنين مابينتهيش للوطن ربى يرجعه زى الاول واحسن

عمار: أحاول دايما التماسك وأهرب بالضحك والهزار لكن جوايا حزن كبير ونفسى ولو فى لحظة اعيش فيها فى وطنى

كامل بتأثر: إن شاء الله ترجع سوريا أحسن من الأول

 

تجلس ندى مع توته:وايه يعنى بتتعلم القراءة والكتابة واتيكيت طب ماهى لسه فاتحة القهوة

توته تصرخ ف وجه ندى: إنتى أيه ياشيخة شيطانه..دى أمى وياما ضحت بحاجات كتير عشان تسعدنى أنا لازم أصالحها

تدخل جمالات ياحبيبتى ياتوته تجرى عليها توته: ياحبيبتى ياماما

الشيخ فتوح: أستغفر الله العظيم

يضربه كامل ويضحك : ياعم الله يحرقك إنت مش عاجبك حاجة

الشيخ فتوح: خيبك الله

يضحك كامل: هو فيه خيبة أكبر من خيبتك

يدخل فوزى وازازه ومشرط يجلسوا

يعطيهم فوزى بعض المال : خد يامحمد خد ياحسن يوميتكم النهارده معلش مش كتير

أزازه: بس بالحلال يامعلم

مشرط: كده احسن يامعلم

فوزى: ربنا يخليكوا

يدخل حمو يقول إنشاد دينى

يقف كامل: ياريت نحاول نشيل الخلاف الل بينا ونحاول نتقابل فى حتة نشتغل وندور على هدف يجمعنا كلنا ساعتها هنبقى ف حتة تانية

ستار

 

 

 

 

 

 

 

 

 

 

 

 

 

 

 

 

 

 

 

 

 

 

 

اضف رد

لن يتم نشر البريد الإلكتروني . الحقول المطلوبة مشار لها بـ *

*