الرئيسية / الرئيسية / سهيرعسكر تكتب:  يوميات_زوجه_صايمه

سهيرعسكر تكتب:  يوميات_زوجه_صايمه

سهيرعسكر تكتب:  يوميات_زوجه_صايمه

– عماد..مالك سرحان فى إيه؟
– أبداً يامها..أصل ماما كلمتنى دلوقت وبتقول ان خالى رفعت تعبان شوية
– مين خالك رفعت ده؟ أول مرة اسمع عنه
– أصله طول عمره عايش فى البلد ..بيحب الارض والزرع …خالى دا علامه فى عيلتنا..طاقة إيجابية فى نشر الحب والمودة..دا من كتر حبه للناس وهب نفسه لخدمتهم لا إتجوز ولا خلف….ودى أحسن حاجه عملها فى حياته
– بتقول إيه؟
– إيه مابقولش
– ودا فى مستشفى إيه؟
– لا دا عند ماما…بس ماما بتشتكى منه أوى
– طبعاً …هو حد ناقص بلاوى…كمان رايح يقعد عندهم…هى أمك قادرة تأكل نفسها
– ماتحترمى نفسك شوية…على فكرة عيلة ماما كبيرة أوى
– واضح ياحبيبي بأمارة الفلوس اللى بتستلفها من اخواتك طول الشهر
– مها ماتبقيش مستفزة…طاب عارفه خالى ده عنده حته ارض كبيرة فى بلدنا وعمارة هنا فى القاهرة بتجيبله إيراد كبير دا غير معاش كبير أوى
– وعاوزنى أصدق الكلام ده…فيه حد فى عيلتكم الكحيانة دى معاه فلوس..كان بان عليكم يابابا
– طاب عارفه هو عارض ٩٠٠٠ جنية فى الشهر للى يستضيفه فى بيته لحد مايكمل علاجه
– ياسلاااام ….اومال أمك مش طيقاه ليه؟
– ماانتى عارفه طبع مامامبتحبش حد يجادلها،وهو بيحب يتناقش شوية…بقولك ايه يامها..مانجيبه هنا عندناونستفيد بالفلوس…دول ٩٠٠٠جنية
– الفلوس مش كل حاجه ياحبيبي …أنا ناقصة وجع قلب ..كفايه عليا شغل البيت وابنك وطلباتك اللى مابتخلصش
– ما أنا هساعدك
– طاب سيبنى أفكر شوية
– دى فرصة يامها والفرصة مبتجيش للواحد غير مرة واحدة بس
– ياساتر على زنك…خلاص أنا موافقه
وفى اليوم التالى
عماد : شرفت ياخالى ..إتفضل…ماتقومى يامها ترحبى بخالى رفعت
مها : أهلاً وسهلاً ياخالو شرفتنا اتفضل
رفعت : أهلاً بيكى يابنتى
مها تهمس: هو مال شكله كده مأيح ولا باين عليه فلوس ولا حاجه
عماد : بس لياخد باله
مها : ثوانى واحضرلك لقمه تاكلها وللا تشرب شاى ونتسحر بالمرة؟
رفعت : لا يابنتى مش عايز أتعبك
مها : تتعبنى ازاى..متقولش كده..اعملك شاى
رفعت : لو مفيهاش تعب إعمليلى إكسبريسو
مها : هاه
رفعت : وبعدها حته كنافه بالقشطة ولو مفيش يبقى طبق إكلير صغير وحتتين جاتوه…آه وماتنسيش بقي حاجه ساقعه دايت بعد الاكسبريسو
مها : ايه؟؟ عماد ماتشوف خالك
عماد : خالى هو انت هتاكل دا كله؟ …انت مش عندك سكر
رفعت : بتقول ايه عَلِى صوتك شوية
عماد : إنت مش عندك سكرررر
مها : بالراحه ياعماد هتصحى الواد
رفعت : اه…ماهو أصل السكر نازل شوية
مها : انزل ياحبيبي هاتله طلباته
عماد : أجيب ايه؟ انتى عارفه دول بكام؟
مها : ابقى خدهم من ال٩٠٠٠ بتوعه
عماد : أمرى لله
رفعت : بتقولوا حاجه ياولاد
مها : سلامتك ياخالو
رفعت : ايه؟؟
مها : بقول ترتاح شوية على ما أجهز السحووووور
رفعت : لأ أنا هاجى معاكى المطبخ أتسلى شوية
وبعد قليل
رفعت : خدى بقي يابنتى قشري البصل ده
مها : بصل ليه ياخالو
رفعت : هنعمل كبدة اسكندرانى
مها : دلوقتى….ما فيه فول وبيض وجبنه وبسطرمه وطعمية …الكبدة تقيلة على معدتك
رفعت : إيه بتقولى إيه؟
مها : بقول الكبدة تقيييييلة…الله يخربيتك ياعماد
رفعت : قشري وانتى ساكته
مها : حاضر ياخالو أهه…آاااا البصل حرق عينيا …البصل تعبنى وانا عندى حساسية فى عينيا
رفعت : إيه؟؟
مها : عندى حساسييييييا…آااااا
رفعت : خدى شوية القشر دول إدعكى عينيكى بيهم
مها : إيه… بتقول إيه يا راجل انت؟ عينيا بتوجعنى ياخالووووو
رفعت : إنتى بتزعقى ليه؟ ما أنا سامع كويس …هو حد قالك انى أطرش؟…انتى مش بتقولى عينيكى وجعاكى..خدى إمسكى إدعكيهم بقشر البصل كويس من جوا ومن برة عشان ينضفوا ويتجلوا كده
مها : مش ممكن طبعاً..الحمد لله آهو عماد جه أهه..إلحقنى ياعماد
عماد : فيه إيه؟
مها : خالك عاوزنى أدعك عينيا بالبصل
عماد : ليه؟…تدعك عينيها بالبصل ليه ياخالى؟
رفعت : ايه؟

عن Mostafa Mohamed

صحفى شاب عضو نقابة الصحفيين جدول المشتغلين رئيس تحرير جريدة بتوقيت مصر مواليد 7 يوليو 1983