.

.

يوميات_زوجه_صايمه_٣ #الحلقة_١١

1 min read

يوميات_زوجه_صايمه_٣
الحلقة_١١
-عماد ياعماد انت هتنام؟
– أيوة يامها فيه إيه؟ أنا جاى تعبان من الشغل،وعاوز أنام ساعتين قبل الفطار
– شفت أم يوسف عملت إيه؟
– مين أم يوسف دى؟
– أم يوسف اللى ساكنه معانا فى العمارة
– آه…أم يوسف اللى ساكنة فى الدور الخامس
– لأ يا أخى…دى أم يوسف محمد أنا أقصد أم يوسف عبد الرحيم
– آه..لازم اللى فى الدور الأول
– ولا دى كمان …دى أم يوسف عبد الحكيم..العمارة فيها تلاته أم يوسف
– الله!! هو حد قالك انى شغال فى السجل المدنى..هو انا لازم أعرف كل أسامى سكان العمارة..ماتختصري يامها..مالها أم زفت
– أم يوسف اللى ساكنه فى الدور الرابع
– آه..يوسف عبد الرحيم الواد الرخم ده اللى بيضرب فى اللى طالع واللى نازل..اللى أمه شعرها أصفر وحلوة شوية كده
– بتقووول إيه؟
– بقول الواد الرخم
– لأ. لأ بعدها
– آه…اللى أمه حلوة …إيه فيه إيه؟ انتى بتبرقي كده ليه؟…أقصد مش حلوة اوى يعنى
– وإيه كمان غير انها حلوة وشعرها أصفر
– هو مش أصفر أوى ..تصدقى صفاره وحش أوى والشوية اللى جيباهم ع الجنب دول من غير أى مناسبة منظرهم بايخ
– وكمان خدت بالك من تسريحة شعرها وعامل نفسك متعرفش حد
– لا أبداً دا أنا شفتها مرة واحدة بس
– كل ده من مرة واحدة أومال لومرتين كنت عملت إيه؟
– بقولك إيه يامها ..أنا مش ناقص جنان وصايم وعفاريت الدنيا بتتنطط فى وشي..عاوزة إيه السعادى
– أم يوسف دى بقي ضربت عمر ابنك من غير سبب
– من غير سبب ازاى؟ كده من طريق ونص..ماتروحى تسأليها
– وأسألها ليه؟ عمر هو اللى قالى وانا ابنى مش كداب
– دا أنا هطين عيشتها وعيشه جوزها ..أنا رايحلهم..بيستهبلوا دول وللا إيه؟
– عماد إنت رايح فين؟
– رايح أشوف العالم الهمج دول
– انت مش كنت تعبان وهتنام
– يعنى يبقي الموضوع مرتبط بإبنى وأنام؟!
– هتنزل حافى؟!… أقعد ياعماد..عماااد
– آه..عندك حق ..أنا بقول أنزلهم بعد الفطار أحسن
– انت ماتنزلش خالص..أنا اللى هقول لجوزها عشان يلمها
– نعم ياختى!! عاوزة تكلميه إنتى..لأ طبعاً
– انت بتغير عليا ياعماد؟
– أغير دا إيه؟ أنا مش عاوز فضايح فى العمارة ..دى تالت عمارة نغيرها،ومش عاوزك تكلمى حد من الجيران خالص ليعرفوا ان لسانك طويل ويعلموا علينا
– إيه؟ أنا لسانى طويل
– طيب ياعماد أنا هوريك
– هتعملى فيا إيه أكتر من اللى بتعمليه..روحى بقي خلينى أنام
– وبعد قليل
عمر: بابا حبيبي
عماد: روح ياعمر عاوز أنام
– هات تلاته جنية
– خد من ماما
– ماما حرمتنى من المصروف وكل شوية تضربنى وتعذبنى
– وتعذبك؟! ..أكيد عملت حاجه غلط
– لا والله يابابا
– طاب روح دلوقت ..خلينى أنام
– لاااا أنا عاوز فلوس ..أنا عاوز أعاااا ماليش دعوة آااااا
– بس بس غور خد أهه..سيبنى أنام بقي
وبعد الفطار
– مها..انتى حارمه الواد من المصروف ليه؟
– أنا؟! محصلش ..دا كل يوم بيسحب منى فلوس أد كده..يبقي الواد بيكدب يامها..وسيادتك مش عارفه تربيه..انتى أم فاشلة ..كل تصرفاتك غلط والواد بيتعلم منك
– أنا فاشلة؟! وللا انت اللى ملكش أى لازمه فى حياتنا ..خدته معاك مشوار..صاحبته ..قعدت معاه..قلتله تعالى نزور حد..تعالى نصلى ..بتعلمه حاجه..انت عامل البيت لوكنده وبس
– وأنا بجرى على مين؟ انتى اللى بوظتيه..كل اللى يشاور عليه تجيبيهوله وده غلط
– يعنى عاوزنى أحرمه وأعقده فى حياته؟
– لأ بس بالمعقول..دا عنده بدل اللعبة ميه ولابيمسكهم حتى،والنهاردة عاوزة تعمليلي مصيبة مع الجيران ومصدقه عيل عنده أربع سنين ومكدبه الناس كلها
– يعنى طلعت أنا اللى غلطانه فى الآخر ..خلاص ياعماد ..ربيه إنت..أنا ماليش دعوة بيه من هنا ورايح
– نعم ياختى وأنا هقعد فى البيت أربيهولك..اسمعى أنا مستحملك بس عشانه
– خلاص ياعماد ..شوفله أم تانيه تعرف تربيه طالما أنا مش عجباك
– إستنى أشوف مين ع الباب وارجعلك
وعلى الباب
عماد: أيوة ..مين حضرتك يا والدى؟
الجار: أنا جاركم ياابنى اللى ساكن فى الدور التالت
مها: خير ..فيه حاجه حضرتك؟
الجار: إنتوا يابنتى اللى فيه إيه؟ أنا سمعت حواركم بالصدفة من صوتكم اللى جايب آخر المنطقة
عماد: آسفين والله حضرتك..المشكلة بسبب الولد إنت عارف العيال
الجار: لا ما تتعبش نفسك وتشرحلى..أنا عارف المشكلة من أولها..من قبل الفطار..من ساعة أم يوسف أم شعر أصفر ..واخد بالك انت يا أستاذ عماد… أنا دكتور حسن عبد المنعم أستاذ فى كلية الآداب قسم علم النفس والدكتوراة بتاعتى كانت فى موضوع التربية الإجتماعية الخاطئة وتأثيرها السيكولوچى على الطفل المصرى
مها: جيت فى وقتك حضرتك..إنصحنا نعمل إيه مع الولد
الجار : بصوا ياولاد ..إنتوا مشكلتكم تتلخص فى كلمتين اتنين
عماد: أيوة…إحنا سامعين إتفضل حضرتك
الجار: لما انتوا مش فاضيين تربوا الواد بتخلفوا ليه؟ بتتنيلوا تتجوزوا ليه أصلاً ..بتقرفونا معاكوا ليه؟ من يوم ماسكنت فى العمارة النحس دى ،وأنا مش عارف أنام منكم..لو سمعت صوتكم تانى هبلغ عنكم..جاتكوا داهيه..عالم غجر
وبعد قليل
مها: عماد..احنا إتهزقنا..صح؟
عماد: باين كده
مها: طاب يللا عشان نتسحر
عماد: يللا بينا
***يتبع***
سهير_عسكر

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Optimization WordPress Plugins & Solutions by W3 EDGE