.

.

يوميات_زوجه_صايمه_٣ #الحلقة_١٢

1 min read

#يوميات_زوجه_صايمه_٣
#الحلقة_١٢
– عماد. ياعماد..انت فين؟
– أيوة يامها..أنا كنت بصلى الضهر ..فيه حاجه؟
– أبداً ..بس عاوزة أتكلم معاك شوية
– خير عاوزة حاجه..أكيد عاوزة فلوس وللا أنا نسيت أشترى حاجه للبيت..إرغى
– لا يا أخى..أنا عاوزة أفضفض معاك شوية ..حاسه انى مقصرة مع ربنا أوى
– مع ربنا بس؟!
– انت قصدك إيه؟
– لا ولا حاجه ..قومى إستهدى بالله وصلى وامسكى المصحف شوية ،وحَسِنى معاملتك مع الناس شوية ..هاه..كل الناس اللى فى البيت واللى بره..فهمانى
-تصدق انا غلطانه انى اتكلمت معاك..
– بصراحه انتى من يوم ماماتت عمتك الاسبوع اللى فات،وانتى متغيرة لا بتزعقى ولا بتتخانقى ولا بتعملى مشاكل
– فعلاً انا حاسه ان الموت قريب أوى عشان كده متغيرة
– ياريت كل يوم يموت حد من العيلة ..عشان تعقلى ههههه
– أعقل؟!….يانهارك اسود..انت بتشتمنى ..دا أنا هطلع عينك
– ياخسارة باين عليا حسدتك..يافرحه ماتمت
– كده ياعماد…بتتريق عليا وأنا فى لحظه توبه وصفاء مع النفس
– صفاء….مين صفاء دى؟!
– ههههه..ايه خفه الدم دى ..بقولك ايه..أنا بفكر أعمل حاجه كده لله بمناسبة اننا فى شهر رمضان
– زى إيه؟
– ماتيجى نعمل إفطار جماعى ونعزم كل قرايبنا
– آه..زى السنة اللى فاتت وأمى وأمك يمسكوا فى بعض
– خلاص..نقسمها..أهلى فى يوم وأهلك فى يوم تانى بعدهم على طول
– واشمعنى أهلك الأول
– خلاص ياسيدى ..مامتك واخواتك الأول
– طاب والعزومه على مين؟
– على مين دا إيه؟…هو مش انت راجل البيت؟؟
– أيوة بس صفاء جاتلك انتى..هههههه
– ماشي ياخفيف…فيه قرشين كنت شايلاهم على جنب كده هعمل بيهم العزومات
– أيوا كده…ياريت صفاء دى تيجى كل يوم..خلى المستخبى يبان..دى ماما هتفرح أوى..أول مرة من يوم مااتجوزنا تفكرى فى حد من أهلى وتوجبى معاه
– أنا مبفكرش فى أهلك…أنا بعمل لآخرتى
– وماله ..كله مصلحه برضه ،وبالمرة ياروحى كنت محتاج قرشين ضرورى ..عاوز أشترى قميصين جداد
– عماد …بلاش استغلال،وكمان انت عندك لبس كتير…اعمل شويه لآخرتك
– مرة من نفسي…حبيبتى…اعملى انتى وألبس أنا
– كده….حااااضر….هتلبس ياعماد…اوعدك انك هتلبس
– ربنا يستر
وفى يوم الافطار
مها : شرفتى ياطنط فتحية…نورتونا ياجماعه
سعاد أخت عماد تهمس لأمها: هى هتموت وللا إيه؟
والدة عماد( فتحية) : تسلمى ياحبيبتى( وتهمس لإبنتها) : أنا عارفه..هى بتبصلنا كده ليه؟
عماد : والله مها من الصبح واقفه على رجليها عشان تطبخلك الأكل اللى بتحبيه ياماما
فتحية : ربنا يخليهالك ياحبيبي ويهديكوا على بعض ..تعالى يا واد ياعمر سلم على تيتا
آمال أخت عماد : نساعدك فى حاجة يامها؟
مها : لا ياحبيبتى ..مش فاضل غير الرز،ولسه الوقت بدرى باقي ساعه ع المغرب..هو محمد ومراته مجوش ليه؟
سعاد : معلش أصل عنده شغل وهيفطر هناك،ومراته فى بيت أبوها،وبيعتذرولك
سعاد(تهمس لعماد) : سبحان مغير الأحوال..خير اللهم اجعله خير
وفى المطبخ
عماد : هاه..خلصتى
مها : لسه شويه..هما مالهم؟! مستغربين كده ليه؟!
عماد : أصل بصراحة….أقول وللا تزعلى
مها : لا قول طبعاً
عماد : أول مرة يشوفوكى هادية كده…أنا نفسي أول مرة أشوفك رايقه كده
مها : ياساتر …هو أنا كنت فظيعه أوى كده؟؟
عماد : مش اوى يعنى…ياحبيبتى كلنا بنتعصب وبنخرج عن شعورنا …المهم…خلصتى..عشان قاعدين لوحدهم
مها : ياخبر دى الأنبوبة شطبت..ارفع معايا ياعماد
عماد : لا دى خلصانه خالص
مها : طاب تعالى نركب الإستبن
فتحية : بتعملوا إيه ياولاد دا كله؟؟
عماد : ولا حاجه يا ماما ..بنغير الأنبوبة بس
فتحية : طاب اوعى انت..روح أقعد مع اخواتك..أنا هغيرها مع مها حبيبتى وأكمل معاها الأكل،وأنا فى ديك الساعة لما أساعد مرات ابنى حبيبي
عماد : ميصحش ياماما
فتحية : روح انت بس..هو بيت ابنى مش بيتى
مها : طبعاً ياماما…اتفضلى
عماد : هسيبكم أنا بقي
فتحية : هاتى مفتاح الأنبوبة…أيووووة كده تمام…خلاااااص…أنا ركبتها…هاتى بقي عودة كبريت نجربها لاتنفجر فى وشنا ،وانتى تمسكى فوطه وتبليها مية …لو لاقيتى الأنبوبة بتولع…سديها بالفوطة على طووول…هاه..ركزى يامها..لاتضيعينا
مها : حاضر …متخافيش يا ماما..أنا بليت الفوطة …ولعى بقي
فتحية : يامصيبتى الأنبوبة ولعت…هاتى يامها الفوطه …يامها..هى راحت فين دى..الفوطه بسرعة
مها : مقدرش أدخل ياماما…النار جامده
فتحية : انتى طلعتى وقفلتى عليا…عاوزة تولعى فيا يابنت الكلب…آااااا…افتحى الباب…الفوطه..النااار…ياعماااااد…عماااااااد
***يتبع****
سهير_عسكر

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Optimization WordPress Plugins & Solutions by W3 EDGE