.

.

يوميات_زوجه_صايمه_٣ #الحلقة_١٣

يوميات_زوجه_صايمه_٣
الحلقة_١٣
عماد : يا آمال..يا سعاد..تعالوا عشان الفطار جهز لحد ما أصحى ماما..يابنات. مها خلصت الأكل ..إيه ده..محدش بيرد ليه؟ أما أدخل أشوف مشغولين فى إيه..أنا هتسحب واعملهم مفاجأة
آمال: طاب إيه رأيك ياسعاد إحنا نغرق الأوضه بتاعتها مية وكأننا بننضف ونوصل سلك الكهربا بالمية وهى أول ماتصحى من النوم وتحط رجلها فى الأرض تتكهرب،وبكده نخلص منها
عماد على الباب(يهمس): إيه ده؟ عاوزين يكهربوا مين؟
سعاد : مها دي بسبع أرواح ،وبعدين الموته دى بشعه..حرام ،وفيها سين وجيم شوفيلنا حاجه أسهل
عماد: مها!! عاوزين يموتوها؟! …بس طول عمرك حنينه يابت ياسعاد
سعاد : إحنا نيجى من وراها فجأة ونشيلها هيلا بيلا ونرميها من البلكونه وكأنها وقعت وهى بتنشر الغسيل
عماد : حتى انتى ياسعاد!!
آمال : لا لا الموته دى هتعملنا دوشه ..عاوزين حاجه لافيها صوت ولا دوشة
سعاد : يانهار اسود…عماد
عماد : أيوة عماد …اللى قاعدين فى بيته وبتفكروا تمَوتوا مراته…وصل بيكم الكُره والجحود للدرجة دى ..انتوا إيه اللى حصلكم
سعاد : ياسلااام ومالك محموء اوى كده ..مش دى اللى ولعت فى أمك من يومين ..أمك اللى متلقحة جوا دى وللا لأ…مين السبب فى رقدتها ؟؟ مش مها دى اللى عملالك مشاكل كل يوم ،وكانت هتسجنك؟
آمال : آه…احنا بنفكر ناخد حق أمنا..أما انت خليك فى اللى انت فيه
عماد : ومافكرتوش فى بيتى اللى هيتخرب..فى ابنى اللى هيتيتم ،والتانى اللى فى بطنها ..طاب خافوا على نفسكم
آمال : ماتخافش مااحنا كنا هنفخى البصمات ونتفق على كلام واحد
عماد : طول عمرك هبله يا آمال..انتوا مش مكسوفين ..بقي هى دى أخلاقنا؟ هو دا اللى بابا الله يرحمه ربانا عليه ..بابا اللى كان حافظ القرآن ،وبيصلح بين الناس ..ولاده يفكروا التفكير الإجرامى ده؟! ،وبعدين مها مكنتش تقصد
سعاد : مكنتش إيه ياخويا..وأمك اللى اتحرقت دى
عماد : أولاً مها خافت وجريت ومكنتش فى وعيها ،وثانياً أمك مفيهاش حاجه ..دى حاجه بسيطة فى ايديها وهتخف،والمفروض انكوا تهدوها مش تولعوا فيها،ومها أصرت ان أمى تقعد معانا هنا لحد ماتخف وعملتلها أوضه مخصوص وأكل مخصوص وبتخدمها…كل ده ولسه زعلانين
فتحية ( تدخل فجأة) : هاه…عملتوا إيه يابنات عشان نخلص من المزغودة دى؟
عماد : حتى انتى ياماما؟! هو إيه اللى بيجرى
فتحية: بسم الله الرحمن الرحيم…مش تكح ياواد..قطعت خَلَفى
عماد : هو انتى لسه ناوية تخلفى تانى…ليه؟ عشان تكملى بقيه العصابة ،وبعدين انتى اللى داخله مستعجلة ع الأخبار مش شيفانى وانا واقف..ليه كده يا أمى ؟ هى دى الأخلاق اللى ربيتونا عليها ..بتشجعيهم ع الأذية
فتحية : مالك ياروح أمك ..انت ياواد صنفك إيه؟ دا أنا اتحرقت ..صباعى دا اللى إتشوه مش صعبان عليك ..إخص عليك عيل ناقص ..ياخسارة تربيتى فيك
عماد : ماشي يا أمى مش هرد عليكى ..أما الهوانم دول يروحوا على بيوتهم
سعاد : انت بتطردنا من بيتك ياعماد
آمال : انت اتجننت؟!
عماد : يوووة…والله لأمشي أنا من البيت خالص
فتحية : رايح فين ياواد …مش هتفطر ؟
عماد : رايح أشوف الغلبانه اللى جوا دى …يامها…يامها
سعاد : احنا زودناها …صح
فتحية : إتنيلى انتى وهى ..مش توطوا صوتكوا شوية ..جاتكوا داهية خِلفه تعر
وفى غرفه مها
مها : ألووو…أيوة يا أم مبروك…كلمتى الشيخ عبد النعيم وللا لسه…أهُم مرزوعين عندى ..أنا عاوزاه يعملهم عمل يخليهم يلفوا حوالين نفسهم ..بالذات البت الصفرا اللى اسمها آمال دى وماتنسيش أمهم الأرشانه دى …ياخبر ….عماد…دا…دا…أصل
عماد : أنا قاعد وسط عصابه وللا ايه؟! انتوا عاوزين تجننونى ؟! هما بيفكرولك فى موته وانتى قاعد هنا بتعمليلهم فى أعمال..دجل وشعوزة يامها..وفى رمضان..أنا حاسس انى فى جهنم الحمرا
مها : هما مين اللى عاوزين يموتونى دول…اخواتك طبعاً والحرباية أمهم ..هما فين ؟ نهار أبوهم اسود
عماد : حرباية…ونهار أبوهم اسود؟! انتى عارفه مين أبوهم ده؟! …لاحظى انك بتغلطى فى أمى و أبويا
مها : ولسه ياحبيبي هدخل على بقية العيلة
عماد : انتى كده جبتى آخرك معايا،وحَل طلاقك
فتحية تدخل فجأة : زغرتى يابت انتى وهى

عماد : روحى وانتى…..
مها : لأ يا عماد
*****يتبع****
سهير_عسكر

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Optimization WordPress Plugins & Solutions by W3 EDGE