.

.

يوميات_زوجه_صايمه_٣ الحلقة_٩

1 min read

يوميات_زوجه_صايمه_٣
الحلقة_٩
– مها..يا مها…تعالى أقولك حاجه
– خير ياعماد ..فيه إيه؟
– واحد صاحبى معاه خمسين ألف وعاوز يعمل مشروع
– واحنا مالنا؟
– إستنى بس…ماهو قالى خدهم واعمل انت المشروع والمكسب التلت والتلتين..هو برأس المال وأنا بالإدارة ..إيه رأيك؟
– لا ياعماد دى مغامرة ،وإنت مابتفهمش فى حاجه،وبعدين الخمسين ألف دول ولا يجيبوا حاجه أصلاً
– إيه مابفهمش دى؟! ماتحسنى ملافظك
– ياحبيبي أقصد المشاريع دى عاوزة خبرة
– ولاخبرة ولاحاجة ..إيه رأيك نفتح بقالة؟
– بقالة…طاب دا عمر إبنك مايخليش فيها حاجة
– ما انا هجيب حد يقعد فى المحل
– ياابنى إحسبه كويس..إنت دلوقتى عاوز إيجار محل وميه وكهرباو،ويمكن تجهزه وتوضبه،وبضاعه ومرتب واحد أو واحدة تقعد فيه..إنت عاوزلك بالميت ٢٠٠ ألف
– طاب إيه رأيك فى الأدوات المنزلية
– البلاستيك غالى ياحبيبي
– يووووة..إنتى بتسديها فى وشي ليه؟
– ياابنى هى مسدودة لوحدها..صاحبك دا ناصح ريح نفسه من التفكير ودراسة الجدوى والتجهيز والبيع والشرا،ورمى الكورة فى ملعبك،وهيكسب ع الجاهز..إنت محتاج مشروع بيتى
– بيتك ازاى يعنى؟؟
– أقصد حاجه تتفتح فى البيت
– اوعى تقوليلي..مشروع الكتاكيت اللى عملتيه السنة اللى فاتت،وخسرنا فيه دا أنا كنت هتحبس بسببه
– لا دا مشروع أرانب…ارانب مستوردة..دى مكسبها فيها
– لا مستوردة ولامصرية..أنا مش عاوز ألعب فى أى حاجه فيها الروح ..إفرض الأرانب ماتت ..أقول للراجل إيه أنا بقي؟
– خلاص ماتفتحش مشاريع خالص،وخد الفلوس حطها فى بنك،وسوح الراجل سنه وللا اتنين،وإستفيد انت بالأرباح وفى الآخر قوله المشروع خسر وانا جمعتلك فلوسك بالعافية وشكراً
– ياشيخه حرام عليكى ..دا احنا فى رمضان..يعنى الراجل يآمنلى وأنا أغشه
– خلاص رجعله فلوسه
– بس أنا نفسي أثبت ذاتى واعمل حاجه ألاقى نفسي فيها
– أقولك …تعالى نجيب شوية خضار وفاكهه ونبيع أنا وانت فى الشادر
– والله فكرة…وآخد أجازة من الشغل شهرووللا اتنين أو استقيل خالص
– عماد..نام ياحبيبي إنت باين عليك لسعت…الفلوس لحست مخك
وبعد قليل
– عماد…ياعماد …اصحى ياعماد ..مش عارفه أنام منك..عمال تضرب وترفس فيا..عماد..إيه ده إنت بتتكلم وانت نايم
– يللا البطيخ…يللا البطيخ..ع الدواق..ع الدواق..قربى يامدام ..قرب يابيه..ب خمسة جنية ..خمسة جنية بس البطيخة ..يللا البطيخ
– اصحى ياعماد…عمااااد
– إيه فيه ايه..بتصحينى ليه؟ دا أنا كنت فى أحلاها نومه
– يا أخى عمال تضرب فيا من الصبح..دا نوم ده
– أما أنا كنت بحلم حلم
– عارفه..كنت بتبيع بطيخ
– عرفتى منين؟!
– هههههه…قرب يابيه..قربى يامدام…عماد..أنا بدأت أشك فى قواك العقلية ..رجع الفلوس للراجل ياعماد
– لأ يامها…دا شقايا..حلمى اللى هحققه
– شقاك دا إيه؟ إنت جرى فى مخك حاجه..رجعها أحسنلك
– لا يامها
وفى اليوم التالى
– خلاص ارتحتى ياستي..الراجل إتصل بيا وقالى إن مراته تعبانه أوى ولازم تعمل عملية ..قريتى فيها
– أحسن ..إديهاله
– أنا بقول ..نشتغل بيها شوية لحد ما مراته تخلص أشعة وتحاليل..انتى عارفه الحاجات دى بتاخد وقت
– يا أخى حرام عليك ..حط نفسك مكانه..لو أنا اللى تعبانه..كنت هتضحى بيا وتفكر فى مشاريع
-آاااا
– إنت لسه هتفكر
– ماهو انا مكنتش هضحى بيكى أوى يعنى
-عماد…بكرة تروح للراجل تديه فلوسه
– أنا بكرة مش فاضى
– طاب بعده
– إفتكرت…أنا بعد بكرة هروح ل سعاد أختى
– عمااااد…كلمة واحدة ..ترجع للراجل فلوسه
– حاضر بس إدينى فرصة …مش هاين عليا والله
وبعد يومين
– مها يامها…الحمد لله ..الراجل قالى إن مراته بقت كويسة والتشخيص كان غلط ،ومش محتاج الفلوس وقالى كمان إعمل المشروع اللى انت عاوزة ومش هسألك على مكسب لحد ماتقف على رجليك وترتاح خالص…يللا بينا ع الشادر عشان نلحق نجيب الخضار
– يالهوووى …عليه العوض فى مخك ياعماد
***يتبع***
سهير_عسكر

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Optimization WordPress Plugins & Solutions by W3 EDGE