.

.

يوميات_زوجه_صايمه_٣ الحلقة_١٥

يوميات_زوجه_صايمه_٣
الحلقة_١٥
عماد : أنا ياعمى جيت عشان أعتذر وأصالح مها مراتى ومستعد لأى حاجه تطلبوها منى( ويهمس ل حازم : كويس كده)
حازم يهمس : تمام
مصطفى والد مها : ياابنى احنا بالنسبة لنا مفيش مشكلة ..دا هى اللى مش عاوزة ترجعلك
نوال والدة مها : مفيش مشكلة ازاى بقى ..بعد ما يفكروا يقتلوها عاوزها ترجع معاك عادى كده؟! لا يمكن طبعاً
مها : أيوة ياسي عماد أنا ليا أهل..انت مش واخدنى من الشارع
عماد : ماتقول حاجه ياعمى
مصطفى : أيوة طبعاً هقول ..خلاص يا أم عصام ..سيبى البت تروح مع جوزها،والراجل جه واعتذر
نوال : اسكت انت خالص
مصطفى : حاضر
عماد : هو دا آخرك؟!
مصطفى : يابنى ماانت شايف
عماد : حازم قول حاجه؟
حازم : أولاً أنا مبسوط أوى النهاردة
نوال : مبسوط دا إيه انت التانى ؟ دا ماله ده؟!
حازم : هقولك ياحماتى ..قصدى يا أمى ..مبسوط عشان النهاردة عيد ميلاد أجمل وأرق وأحسن أم فى الدنيا ..الست اللى ربنا رزقنى بيها وعوضنى بيها عن حنان الأم..إتفضلى أحلى وأغلى ازازة برفان..شفتها فى المحل قلت دى إتعملت مخصوص عشان ماما نوال
نوال : أااأ أ..بس النهاردة مش عيد ميلادى يابنى
حازم : كل يوم بنشوفك فيه بصحة وبخير هو عيد ميلاد ليكى ،وفرحة كبيرة لينا كلنا ياغالية..ايه الجمال ده انتى بتصغرى وللا إيه؟!
نوال : ياحبيبي يابنى…شايف الذوء ياسى عماد
حازم : عاوزين بأه نلم شمل العيال دول عشان تفضى لنفسك شوية يابطه..انتى خسيتى أوى اليومين دول
مصطفى : خست دا إيه؟! انت مش شايفها ضربت من كل حته ازاى؟!
نوال : ياساتر على ألفاظك ياأخى..دايماً كاسر بخاطرى كده
حازم : هاه..قلتى إيه ياقمر؟
نوال : وأنا أقدر أرفضلك طلب ياروح ماما..دا انت ابنى اللى مخلفتوش..يللا يابت يامها مع جوزك
نهى أخت مها وزوجه حازم : لا ياحازم لو سمحت ماتضيعش حقها ..لازم يعرف غلطته
حازم : حبيبه قلبى أنا عاوزها تهدى و تبقي عاقلة وراسية زيك كده وترجع عشان خاطر ابنها
نهى : بس!!
حازم يهمس ل نهى : عاملك مفاجأة النهاردة مش عاوزها تضيع بسبب مشاكلهم التافهة دى
نهى : أنا بقول برضه ترجعى لبيتك يامها
مها : ايه؟ أروح مع مين ..أنا لايمكن أعيش وسط العالم الهمج دول
عماد : لمى لسانك يامها
مها : شايف قله أدبه ياحازم
***حوار جانبى
حازم يهمس ل عماد : إهدى وسيبنى أتصرف..بقولك ايه هات ٣٠٠٠جنية وأخليها ترجع معاك من غير رغى كتير
عماد : ليه؟ دا أنا لسه دافعلك ٢٠٠٠ جنية ع القهوة من يومين
حازم : هتدفع وللا أخليهم يطردوك وأبوظلك الدنيا
عماد : ماشي ..بس…قولى هتقنع مها ازاى
حازم : مالكش فيه..هات
عماد : حاضر حاضر بس خلصنى من الليلة دى بقي
******
حازم : مها يامها كنت عاوزك فى كلمتين كده
مها : إتفضل لما أشوف آخرتها معاكوا
وبعد قليل
مها : خلاص ياماما ..أنا هرجع مع جوزى ..ماهى الواحدة برضه فى الآخر ملهاش إلا بيت جوزها..وانا معنديش أغلى منك ياعماد يللا ياحبيبي
عماد يهمس ل حازم : لأ..أعرف انت عملت ايه الأول
حازم : قلتلها ان جايلك علاوة ست شهور مجمدين وهتقبضها الاسبوع الجاى ..يعنى فوق ال١٠تلاف جنية ..وطبعاً ريقها جرى ع الفلوس
عماد : طاب واعمل ايه بعد اسبوع؟
حازم : يا أخى اتصرف..قولها مدير الشركة مات وفرصة كل يوم رايح فين ؟ رايح بيت المدير أأدى واجب العزا ..جاى منين؟ بحضر اجتماعات الشركة لتعيين المدير الجديد ..إتأخرت ليه؟ المسئولية زادت واحتمال ابقي أنا المدير وخدلك اسبوع عيش فيه حياتك بعيد عن النكد والقرف اللى فى البيت
عماد : بقولك ايه..ماتسيبنيش..خليك على اتصال بيا
حازم : أسيبك دا إيه؟ انت مش عازمنا أنا ومراتى على السحور النهاردة برة فى فندق خمس نجوم
عماد : أنا؟! أنا قلت كده
حازم : هتقول دلوقت لحسن والله أخربها على دماغك
حازم بصوت عالى : ياجماعه…عماد عازمنا على السحور برة
نوال : انت عارف انى مش بتسحر يابنى روحوا انتوا ياولاد
مصطفى : أنا هاجى معاكم أغير جو
نوال : لأ..انت هتقعد معايا هنا
مصطفى : حازم قول حاجه
حازم : أنا شايف ياماما إن عمى وشه أصفر ومتغير اليومين دول..ماتسيبيه يخرج ويتفسح معانا
نوال : لأ ياحبيب ماما..اللون الأصفر لايق عليه
مصطفى : حازم بقولك ايه يابنى ( ويهمس) عندى مشوار وعايز أزوغ
حازم يهمس : يعنى مايتأجلش لبكرة
مصطفى : هحاول
حازم : طاب أظبط عماد النهاردة وأجيلك بكرة أكون ظبطلك حوار تغيب فيه كام يوم
مصطفى : ياريت لحسن دى كابسه على نَفَسي اليومين دول
حازم : ماتقلقش..( ويعلو صوته) يللا بقي ياجماعه
نهى : أنا هدخل ألبس وأجهز نفسي
مها : وانا كمان هلبس وأجيلكم
حازم : بس بسرعة….اه افتكرت ..عماد..بالمرة عدى على السوبر ماركت اللى فى طريقنا عشان تجيبلنا شوية حاجات للعيال اللى فى البيت
عماد : أنا اللى هجيب لعيالك؟!
حازم : أومال عيالى يناموا من غير أكل عشان سيادتك تصالح مراتك..ادفع وانت ساكت
عماد : حسبي الله ونعم الوكيل
***يتبع***
سهير_عسكر

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Optimization WordPress Plugins & Solutions by W3 EDGE