.

.

#يوميات_زوجه_صايمه_٣ #الحلقة_١٦

مها : والله دى أحلى فسحة اتفسحتها فى حياتى..ماتيجى نخرج زى كده كل كام يوم ياعماد
عماد : هاه
مها : إيه سرحان فى إيه؟!
عماد : ولا حاجه..مش هنمشي بقي؟
حازم : نمشي دا إيه؟! تعالوا ناخد مركب فى النيل نتفسح شوية
عماد : دلوقت دا الفجر قرب
حازم : طاب تعالوا نروح الحسين أو السيدة نكمل باقى الليلة..إيه ده؟؟ دى ألفت…حبيبتى يا ألفت أهلاً وسهلاً
مها : مين دى يانهى ؟! وماله بيبوس فيها كده ليه؟ انتى ازاى هادية وساكته كده ؟!
نهى : دى ألفت أخته
مها : أخته!! أنا أول مرة أسمع ان حازم ليه أخت اسمها ألفت
نهى : دى أخته فى الرضاعه
مها : انتى بتصدقى الكلام الأهبل ده….وطبعاً هو اللى قالك كده
نهى : لا…دى مامته اللى قالتلى
مها : آه…بس دا بيأڤور فى معاملتها اوى..بصي ماسك إيدها ازاى
نهى : لا ماتخديش فى بالك
عماد يهمس: يابن المحظوظه ..دى حلوة اوى..قال أخته فى الرضاعه قال
وبعد قليل
حازم : ألووو..أيوة ياميار ياحبيبتى..أنا سهران برة
نهى : مين دى ياحازم؟
حازم : دى ميار وبتسلم عليكى
نهى : سلملى عليها أوى
حازم : حااضر..هسيبكم وأروح أتكلم هناك ..أصل الشبكة وحشه اوى هنا
عماد : مين ميار دى؟!
حازم : مالك كده ماسك فيا زى العيل الصغير..يا أخى سيبنى خلينى أعرف اتكلم…أبداً يا ميار ولا حاجه وحشتينى أوى ياحبيبتى ..هشوفك امتى..لا مقدرش على كده…ثوانى ياحبيبتى…انت واقف هنا ليه ياعماد؟ روح أقعد معاهم لحد ما آجى
عماد : عاوزك فى كلمتين
حازم : طاب سلام دلوقت ياميار،وهكلمك بعدين…خير ياعماد عاوز ايه؟
عماد : مين ميار دى وازاى بتقولها ياحبيبتى قدام مراتك عادى كده
حازم : وانت مالك؟
عماد : فضول يا أخى
حازم : طاب هات سيجارة وللا أقولك هات العلبة كلها
عماد : خد ..هاه قول بقي
حازم : أنا فهمت نهى انى بشتغل فى عيادة دكتور نفسانى بالليل ،ودى مريضه ولو زعلتها هتولع فيا وفى أهلى
عماد : ياسلام..ووافقت كده عادى؟!
حازم : لا طبعاً ما أنا وريتها صورتها..أهى
عماد : إيه ده؟ دى عيله مايزدش سنها عن ١٣. ١٤ سنة
حازم : اه..ماهى دى صورة بنتها،وركبت الصورة على صوت ميار و عملت ڤيديو فى عيادة دكتور ووريته ل نهى والصراحة ميار صوتها صغنون ورقيق زى الأطفال ودا ساعدنى كتير ،وكمان حطيت برنامج تسجيل مكالمات فى تليفونى ،واتفقت مع ميار على كل حاجه،ونهى مراتى حبت تعمل فالحه وتسمع التسجيلات
عماد : هاه وبعدين؟
حازم : طبعاً نهى إتفاجئت بمكالمات حزينة وتقطع القلب بين طفلة مريضه وعندها مشاكل وواحد غلبان عاوز يساعدها وياخد فيها ثواب ،وطبعاً فهمتها ان الدكتور بيدينى أجر على المكالمات دى لأنى بجيبله معلومات عن المرضى اللى عنده عشان أساعده فى علاجهم وبقيت أجيب ل نهى هدايا أقفل بؤها بيها..لكن فى الحقيقة أنا عندى تليفون تانى وخط تانى بستعمله
عماد : انت إيه يابنى؟!
حازم : أنا عاوز اعيش..إعمل زيي وانت تكسب..شايف مراتى مبسوطه ازاى وشايف مراتك بتبصلها ومبهورة أوى ازاى
عماد : عندك حق…أنا هعمل زيك
حازم : بقولك إيه..شايف المزة الحلوة اللى قاعدة هناك لوحدها دى
عماد : اه…دى صارووخ
حازم : أنا بقي هعملك حوار كده أخليك تقعد معاها وقدام مراتك كمان..اشطه،وأنا هخترع حجه كده وآخد ألفت وأطير
عماد : ماشي
وبعد قليل
مها : يالهووووى..يانهارك اسود ياعماد..بتمسك ايدها كده عينى عينك..بتخونى ياعماد
نهى : إهدى يامها شوية..مش كده فرجتى علينا الناس…ياحازم…ياحازم
حازم : فيه إيه؟ سامع صوتكم من برة (يهمس ل عماد) :هببت ايه؟ دا أنا لسه سايبك من خمس دقايق
مها : إلحقنى ياحازم…قال إيه دى عميلة عنده فى الشركة ،ووافقت انه يكلمها فى مصلحة هتدخلنا مبلغ كبير …عمولة يعنى وأتفاجئ بيه بيمسك ايدها وقدامى كمان أعاااا..أنا مصدومة ياحازم
حازم : بس إهدى يامها…إيه ده؟ أنا آخر حاجه أتصورها إنك تطلع بالأخلاق دى ياعماد
عماد يهمس : جرى إيه..مش انت اللى قلتلى؟!
حازم يهمس : قلتلك إيه جاتك خيبة..أنا قلتلك إمسك إيدها..إيه مشفتش حريم قبل كده؟!… إنجز وهات ٢٠٠ جنية عشان أصلحلك الموقف ده
عماد : مفيش فلوس
حازم : كده…( ويعلو صوته) نهى خدى مهاأختك وروحى ع البيت..أنا هركبكم تاكسي ..هى هتبات عندنا النهاردة ..لما نشوف الأخ عماد اللى بيعيش مراهقة متأخرة ده..اخص عليك راجل عديم الأخلاق..حد يسيب مراته القمر ويبص للأشكال دى؟!
عماد : على فكرة الكدب حرام فى رمضان ياحازم
مها : شايف بيقول إيه؟
حازم : جاتك داهية قِفل
نهى : وانت ياحبيبي هتروح فين؟
حازم : لا أنا هوصل ألفت للبيت أصل بباها تعب فجأة واتصلوا بيها،وهبات عندها الليلة قصدى هبات عند ماما وبكرة بالليل أكون عندك بعد العيادة وكمان عشان تاخدى راحتك فى البيت انتى واختك…هتوحشينى أوى ياحياتى
عماد : هتبات عند أمك برضه؟! طاب ماتاخدنى أبات معاك وأديك ٣٠٠جنية
حازم : اخرس ياسافل
***يتبع***
#سهير_عسكر

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Optimization WordPress Plugins & Solutions by W3 EDGE