.

.

يوميات_زوجه_صايمه_٣ الحلقة_٢٠

يوميات_زوجه_صايمه_٣
الحلقة_٢٠
مها : عماد يللا ياعماد هنتأخر
عماد : ايه ده..انتى هتيجى معانا؟
مها : أيوة طبعاً أومال هسيبكم لوحدكم انت ولارا فى موقف زى ده
عماد : ياحبيبتى ارتاحى انتى وانا هتصرف
مها : لاياحبيبي أنا مرتاحه كده..لازم أحضر الاتفاق بتاع جوازك يالارا ياحبيبتى..هو أنا عندى أغلى منك
لارا : الله لايحرمنى منكن حبايبى
مها : يللا ياحبيبي هنتأخر على الناس
وأثناء المقابلة
مها : كويس انكم اختارتوا المكان الحلو ده عشان نتفق فيه على تفاصيل الجواز
عماد : فعلاً الجو فى الفندق هنا تحفه( ويهمس) لأ وأهل العريس باين عليهم ناس محترمين
والد العريس : احنا اتشرفنا بمعرفتكم يا أستاذ عماد
والدة العريس : لأ ومدام مها ماشاء الله كلها ذوء ..ست بمعنى الكلمة
نادر ( العريس) : دول أصحاب لارا واكتر من اخواتها
والدة العريس : تشرفنا يافندم
مها : ربنا يخليكوا ياحبيبتى..الشرف لينا إحنا ندخل فى الموضوع بقى
والد العريس : والله ياعماد ياابنى ..أنا بقول اللى يتفق عليه نادر ولارا هو اللى هيمشي
عماد : وأنا برضه شايف كده،ووالد لارا كلمنى فى التليفون النهاردة الصبح وبيعتذر عن غيابه لأنه مريض وممنوع من السفر
والد العريس : بعد مانتفق ان شاء الله هنسافر أنا ونادر نزوره ونتمم الجوازة
عماد : خلاص على بركة الله
مها : إيه ده؟ هو سلق بيض وللا إيه..هو احنا اتفقنا على حاجة لسه
والد العريس : حضرتك الولاد خلاص اتفقوا
والدة العريس : وفى النهاية ياحبيبتى كلها شكليات المهم يكونوا متفقين وسرهم هادى
مها : لأ لأ..انتوا هتكلفتونا وللا ايه..ماتقول حاجه ياعماد؟
عماد (يهمس) : أقول ايه..واحنا مالنا..احنا هنا منظر وبس
مها تهمس أيضاً : اتكلم عن نفسك،ويعلو صوتها : بصوا بقي ياجماعة الأول هنحدد المهر والمؤخر ومش هنتقل عليكم ١٥٠ألف مهر و٤٠٠ألف مؤخر،وبعد كده نشوف آخر قايمه إتكتبت فى عيلتها وتكتبوا زيها..أما الدهب فطبعاً لازم يكون عيار ٢٤ ومش أقل من ٥٠٠جرام …أما بالنسبة للشقة فأكيد هتتكتب بإسمها..إفرض ابنكم قل بأصله معاها تروح فين البنية،ويفرشلها مش أقل من أربع أوض وصالة وماتنسوش أوضه الأطفال،وتكون تشطيب لوكس وفى منطقة راقية و……
لارا : شو؟! أكيد عم تمزحي..ليش كل هاى التكاليف؟
مها تهمس لها : اسكتى..انتى متعرفيش مصلحتك
والد العريس : بس دا كتير يامدام مها..هما كانوا هيقعدوا معانا مؤقتاً لحد ماينقل شغله فى لبنان ويسافر معاها ويستقروا هناك
مها : واحنا بنتنا مش رخيصة ولا رميه…وبعدين انت ناسي انها لسه هتجيب نجف وسجاد ومفارش وفوط وأجهزة وطقم صينى وكبايات ..دا غير النيش اللى هتملاه ..يعنى مش واخدينها ببلاش..طاب دى رفضت ابن عمها الغنى عشان إبنكم ،وابن خالتها اللى كان هيموت عليها..إيه التضحيات دى ببلاش
لارا : حبيبتى شو ياللى عم بتقوليه؟ نحنا متفقين على كِل شى
مها : أومال جيبانا ليه..صورة يعنى؟!
لارا : جبتكن لتقاسمونا فرحتنا..مو تحكوا فى تفاصيل ما إلها أى قيمة ..حاجتك بقى تحكى حَكى بلا طعمه
حوار جانبى
مها تهمس لعماد : شايف قله أدبها وبجاحتها قدام الناس ..أنا كلامى مالوش طعم..طاب أرد عليها وأهزقها قدامهم
عماد : أبوس إيدك مش عايز فضايح..سيبيهم يعملوا اللى هما عاوزينه
مها : انت عايزنى أرخصها؟!
عماد : هى كانت من بقيه أهلك ..دى حيالله صاحبتك
مها : أنا عارفه من الأول ان وجودك زى عدمه..أنا بقي اللى همشي الجوازة دى
والدة العريس : بقول ايه يامدام مها…الحاجات دى ملهاش قيمة طالما الأولاد متفاهمين وبيحبوا بعض
لارا : بلييز يامها ماتضيعى فرحتى بهيك تقاليد ما إلها لزوم
مها : انتى يابت مالك ملهوفه ع الجواز كده ليه؟! إوعى يكون غلط معاكى
والدة العريس : لو سمحت يامدام لحد كده وكفاية ..أنا ابنى محترم ومتربى كويس..ماتشوف الست بتاعتك يا أستاذ عماد
عماد : عيب اللى بتقوليه دا يامها
مها : ماعيب إلا العيب ياحبيبي..إسمعوا بقى ..إحنا معندناش بنات للجواز..اللى مانعرفلكوا أصل وللا فصل..يللا يابت يا لارا ع البيت..دى أشكال تتناسب برضه
والدة العريس : انتى ست قليلة الأدب وملكيش حد يلمك
مها : يانهاااااارك اسود …أنا قليلة الأدب ..طاب تعالى بقي ياروح أمك
والدة العريس : آاااااا….يا متوحشه
وفى المنزل
عماد : ينفع اللى عملتيه ده؟! كويس الفضايح دى..تمسكى أم العريس من شعرها وتضربيها بالكوباية تفتحيلها دماغها،وكل بتوع الأمن مش قادرين يحوشوها من تحت إيدك
..إيه متجوز فتوة وللا بلطجى..دا الراجل صاحب الفندق كان مُصر يطلب الشرطة ..لولا انى إتحايلت عليه ودفعت تمن الكوبايات والأطباق اللى كسرتيها
مها : دى ست قليلة الأدب وكانت عايزة تتربى،وانتى يابت يا لارا كفاية عياط..قومى اغسلي وشك بكرة أجوزك سيد سيده..يابت اعقلى دا الجواز فى مصر مفيهوش أى ميزة..تقيدى صوابعك العشرة شمع وتملى النيش كوبايات وكاسات وتحف وفى الآخر يروح يبص لواحده برة
لارا : بس هاى إسمهاعدم ثِأه بالنفس..الأشيا ما إلها دخل
مها : هاه…هههه تصدقى صحيح..بس الحمد لله الكلام ده مش معايا أنا وعماد ..أقصد لو مكنش واحد وَفِى و مخلص زى عماد ودا قليل أوى ..يبقي بلاها جواز أحسن
لارا : بلى..معك حق عماد زلمه طيب وچانتيه ومذواق وكِله حنيه
عماد : وانتى كمان يا لارا بنت حلوة وطيبة وألف من يتمناكى ..امسحى دموعك بقي
لارا : وانت ياعماد…..
مها : وأنا بقي اوصل لغايه المطبخ أعملكم اتنين لمون عشان تهدوا أعصابكم..هو أنا إيه..شفافه بالنسبالكم..قالب طوب قاعد وسطكم
لارا : لا يامها..انتى خيتى وحبيبتى وعماد كمان متل خيي وفرند ما إله مثيل
مها : سجدتينى بقي بالكلمتين دول..طاب بقول إيه ياجماعه..أنا حاسه انى أڤورت فى الطلبات..احنا نتصل بأهل نادر نعتذر لهم ونلم الدور بقي ونمشي الجوازة
عماد : إوعى تعملى كده..عشان كرامة البنت
مها :وانت مالك عايش دور أم العروسة أوى كده …وتهمس لنفسها : فعلاً كرامتها أهم من بيتى اللى هيتخرب..أنا إيه اللى هببته ده؟!
عماد : روحى بقي يا أم عمر إعمليلنا السحور
مها : مين أم عمر دى؟!
عماد : انتى ياحبيبتى..هو عمر دا مش إبننا وللا إيه؟
مها : انت أول مرة تقولى يا أم عمر ..إيه إتفاجئت ب عمر النهاردة؟
عماد : أنا بقول تبصي لمستقبلك يا لارا دلوقتى..أنا حاسس ان نادر ده مكنش مناسب ليكى..شوفتى طول القعدة منطقش بولا كلمة ازاى
مها : عماد انا بكلمك؟!
لارا : وانا بعتقد ان فيه افضل منه كتير بمصر ممكن ارتبط فيهن..بس بفكر بعقلى أكتر هاالمرة
مها : وانا بعتقد انك تسافرى بلدك ترتاحى وتفكرى هناك على أقل من مهلك جنب أمك وأبوكى..مين عارف يمكن نصيبك مستنيكى هناك
لارا : بس أنا بتمنى ارتبط بزلمه مصرى
مها : وأنا بتمنى انك تمشي..قصدى حاسه انك هترتاحى فى بلدك أكتر ياحبيبتى
عماد : سيبيها يامها على راحتها..وجودها فى مصر أفضل..بعيد عن أى ضغوط من أهلها
مها : لا ياعماد أنا بقول تمشي..اه ماانت على قلبك زى العسل ..يا أبو عمر
لارا : أنا فكرت عن جد ارجع ع بلدى بس مالقيت إشي مطرح فاضى على أى خط طيران بمصر
مها : إيه؟ يعنى إيه الكلام ده؟
لارا : كله كومبليت حبيبتى ..أنا بنطر هنا لَبَعد العيد..الجو عندكن بيطير العقل وخاصه فى رمضان
عماد : انتى على راسنا من فوق يا لارا
مها : لأ لأ…كده كتير..حرام أنا مقدرش استحمل لآخر رمضان..ليه..أنا عملت ايه..لأ مش كده
عماد : مها…مالك يامها
مها : كتير وربنا..أروح فين؟ اعمل إيه ياربى ؟ انا اللى جبته لنفسي..أنا اللى جبته لنفسي
لارا : مها…شو بكى؟ دى عم تحكى لحالها…مها …يامها
مها : كتير والله..كتير..أروح فين …دا كتير…لحد العيد…..كتير…. …..
****يتبع****
سهير_عسكر

 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Optimization WordPress Plugins & Solutions by W3 EDGE