.

.

يوميات_زوجه_صايمه_٣ الحلقة_٢١

1 min read

يوميات_زوجه_صايمه_٣
الحلقة_٢١
مها : عماااد ياعماااد..إصحى بقي عشان تجيب الطلبات
عماد : يووووة..إحنا مش هنخلص يامها بقي من المسلسل التركى اللى احنا عايشين فيه ده؟! كل يوم أصحى على كابوس
– قصدك إيه؟
– مقصدش…سيبينى شوية وأنا هقوم على طول
– أنا هسيبك نص ساعة بس وارجعلك..أكون اتفرجت على البرنامج اللى بحبه وهرجعلك اصحيك…سامعني ياعماد..عمااااد
– أيوة أيوة سمعت..روحى بقي
وبعد ١٠ دقائق
عماد : أنا هقوم من نفسي أحسن من سرينة الإسعاف اللى بتصحينى كل يوم دى..يامها..انتى يا بتاعه ..أكيد قاعدة قدام التليفزيون..آدى اللى فالحه فيه..بس النهار كله تشتكى أنا تعبانه..إتهديت..واقفه على رجلى..ما آديكى مأنتخه قدام التليفزيون أهه..أروح أغسل وشي وأتوضا وأصلى على ما الهانم تفضى..إيه الصوت العالى ده؟هو أنا قاعد فى قهوة بلدى..يامها..وطى الزفت دا شوية ..يوووة..أروحلها أحسن
المذيعة : أهلاً وسهلاً بكم ولقاء متجدد عزيزتى حواء وبرنامج إسألى ..هنستضيف النهاردة الأستاذ الدكتور مدحت أحمد عبد الحميد أخصائى الطب النفسي ومستشار العلاقات الزوجية ..بنرحب بحضرتك يا دكتر،وناخد أول اتصال ونقول ألووو
مها : ألوو..صباح الخير معاكى مدام مها من القاهرة
المذيعة : أهلاً وسهلاً بحضرتك يا مدام مها ..بس أستأذنك توطى التليفزيون شوية
عماد يهمس : هى حصلت يامها ..بتكلمى بتوع التليفزيون ..لا دى هربت منك خالص
المذيعة : ليكى أى سؤال أو استفسار للدكتور مدحت
مها : أيوة..أنا متجوزة من خمس سنين..بس تقدر تقول مش متجوزة
الدكتور : مش متجوزة ازاى حضرتك؟
مها : يعنى جوزى مش موجود فى حياتى أصلاً
عماد : يابنت الجزمة مش موجود ازاى..اومال مين اللى بيجيبلك الطلبات كل يوم؟!
الدكتور : اتفضلى كملى حضرتك
مها : يعنى عمره مااهتم بيا..عمره مافكر يقولى كلمة حلوة أو يشاركنى حاجة بحبها أو مناسبة ..عمره مااهتم بأى تفاصيل فى حياتى..يعنى ممكن أغير تسريحة شعرى أو لونه أو طريقة لبسي أو الميكب آب بتاعى ولا بيشوف حاجة أصلاً ولابيهتم يدور على حاجة محتاجاها أو نقصانى ،وكمان بحس ان عينه زايغة ..كل مابيشوف واحدة حلوة بيجرى عليها
الدكتور : وجالك الاحساس دا منين؟
مها : يعنى الاسبوع اللى فات كنت مستضيفه واحدة صاحبتى هنا فى البيت هى من لبنان..لاقيته بيقرب منها أوى ومعجب بيها وبيقولها طول الوقت كلام حلو عمره مافكر يقولهولى..مش قادرة أقول لحضرتك أنا عملت ايه عشان أسفرها بلدها ..أنا اشتريتلها تذكرة السفر بالواسطة من ناس قرايبنا شغالين فى المطار على حسابى وهددتها لو ماسافرتش بلدها هشوه وشها بميه النار
عماد : يابنت المجنونة ..وأنا أقول البت لارا ليه صحيت فى يوم وليلة وأصرت تمشي
الدكتور : ياااه..ازاى حضرتك تفكرى تفكير زى ده؟! انتى عندك أولاد منه يامدام مها؟
مها : عندى ولد وحامل..أنا الصراحة إتسببتله فى مشاكل كتير ..يعنى مثلاً كان ليا جوز أختى هو الحقيقة كان راجل مش مظبوط وبتاع مشاكل وحرامى سرقنا وهرب وإتصرفت من ورا جوزى فى فلوس ودهب خدهم منى النصاب ده على أساس انه يدخلنى بيهم مشروع واضطرينا نستلف المبلغ عشان كان قسط شقة ولازم ندفعه وكمان رفعنا محامى عشان نجيب حقنا..أنا بحب جوزى جداً وبتجنن لو حد قرب منه،وساعات ببقي عصبية وبضيع الدنيا بس من غير قصد والله
عماد : ساعات بس؟؟! ياكداااابه نسيتى الولية أم نادر اللى فتحتى راسها فى الفندق وجرستينا
مها : أنا نفسي يهتم بيا شوية من غير ما أطلب..يلاحظ أى تغيير..يغير شوية من روتين حياتنا نخرج نسهر برة
المذيعة : مفهوم…مفهوم..شكراً لإتصال حضرتك..اتفضلى اقفلى والدكتور هيرد عليكى حالاً
مها : شكراً يافندم…إيه ده؟! عمااد ..انت واقف هنا من امتى؟
عماد : أنا لسه جاى ..ليه فيه حاجة؟
مها- ولا حاجة ..اتفضل بقي روح هات الطلبات وخلصنا..إتلحلح شوية
وبعد قليل
مها : هاه جبت كل حاجة.. اوعى تكون نسيت البيض وللا العيش الفينو ل عمر
عماد : لأ ياستى ..جبت كل حاجة..أنا هنام شوية بقي
– آدى اللى فالح فيه
-على فكرة تسريحتك الجديدة هايلة
– تسريحة إيه؟ أنا مغيرتش تسريحتى
– والله …آه يبقي اللون الجديد هو اللى متغير
– ولا صبغت شعرى كمان..انت مالك بتهيس كده ليه ع الصبح
عماد يهمس لنفسه : الله…اومال تسريحة إيه اللى بتقول إني مش واخد بالى منها…طاب بقولك ايه ياحياتى
– خير إنجز عاوز إيه؟
– أنا عاوز أشتريلك طقم حلو للعيد ،وبالمرة نسهر ونتسحر برة
– بجد ياعماد؟!
– طبعاً وأنا عندى أغلى منك
وبعد الافطار
-ماتمشي شويه يامها..من بعدالمغرب وانتى بتتفرجى والساعة بقت تسعة وما جبتيش حاجة
-الله مش بشوف المحلات الكويسة المتهاودة الحق عليا إنى خايفة على فلوسك
-بس أنا تعبت من كتر اللف..خدى شيلى الواد شوية
-أشيل إيه؟هو أنا قادرة أشيل نفسي..خليه معاك..تعالى هندخل المحل ده
وبعد قليل
مها: بقول إيه لحضرتك ..هو الدريس ده فيه منه أحمر
البياع: للأسف لسه خلصان إمبارح بس
مها: ياخسارة
عماد: ماكويس اللون دا يامها
مها: مش عارفه كده مش مرتحاله
عماد: والله لونه حلو ..خلاص إحنا هناخده حضرتك..يللا بقي عشان نحاسب
مها: إنت مستعجل كده ليه؟ لسه شوية
عماد: لسه إيه تانى؟
مها: هنجيب شنطه وشوز وطقم ل عمر
عماد: بس بس خلاص..بس شدي حيلك عشان تعبت
مها: لو سمحت هى العباية دى بكام؟
البياع: واااو حضرتك ذوءك هايل ..دى عباية إماراتى
مها: بكام يعنى؟؟
البياع: ب ٩٠٠جنية بس..دى عليها ديسكاوند..عشان ذوق حضرتك العالى
عماد: لأ وانت الصادق..دى أسعاركم هى اللى عالية
مها تهمس: بس ياعماد ..ماتفضحناش
وأكملت: خلاص هناخدها
عماد: هتاخدى إيه؟ بيقولك ب ٩٠٠جنية..إنتى انطرشتى،وبعدين ما انتى اشتريتى فستان خلاص وللا هى مصاريف وبس
مها: عماد ..بطل اسلوبك البلدى ده..ع العموم أنا عاملة حسابى وجبت الجمعية معايا
عماد: بتقولى إيه ياختى؟؟ مش الجمعية دى اللى هنصلح بيها موتور المية اللى مغلبنا بقاله سنين
مها: ياحبيبي إصرف مافى الجيب..عماد..بص هناك..شايف القميص ده..الله دا هينطق عليك ..تعالى قيسه
البياع: دا عليه خصم١٥٪ يعنى ب ٦٥٠ جنيةبس..ذوءك حلو يامدام
عماد: أنا مش عايز زفت..إمسكى ابنك عشان تعبت
مها: الله..أومال هتحضر العيد بإيه ياعماد
عماد: مش هحضر خالص يامها هنام،ويللا بقي عشان نمشي ..إمسكى الواد كويس
مها: إستنى بس..بكام الطقم ده؟؟ إيه رأيك ياعماد ..هيبقي حلو أوى على عمر
البياع: ذوء حضرتك هايل يافندم
عماد: لو قلت الكلمة دى تانى أنا هشرب من دمك
البياع: فيه إيه يا أستاذ؟؟ إنت عصبى كده ليه؟
عماد: أنا مش أستاذ..إيه رأيك..أنا صايع ومش هنشترى حاجة والست دى معندهاش ذوء خالص
مها: كده ياعماد!! خلاص أنا مش هشترى حاجة سديت نِفسي ..نبقي نكمل بكرة
عماد: هو لسه فيه بكرة؟!
مها: يانهار إسود..عماد..أومال فين عمر؟؟
عماد: مش كان فى إيدك؟؟
مها: يالهووووى…إبنى ضاع
***تمت***
سهير_عسكر

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Optimization WordPress Plugins & Solutions by W3 EDGE