.

.

 مروة محمد رفاعى  تكتب الدنيا مآسى

 مروة محمد رفاعى  تكتب الدنيا مآسى

إحنا هنحكى هنا عن ناس حقيقية , ناس موجودة معانا وحوالينا , أصحابنا , إخواتنا , زمايلنا . ناس بيحبونا وناس بيكرهونا . كل شخصية هنحكى عنها فى حكاياتنا فى قصتها عبرة .

( السرنجة )

كان طفل من عيلة كويسة إلى حدما …ساعتها زمان كنت تقول ده هيطلع عالم ذرة …. لحد ما العيلة الكويسة دى إنهارت ..الام ماتت ..و الاب مات والاخوات أنشغلوا بالدنيا ونسيوا أخوهم الصغير …

صاحبنا كبر وبقى شاب معاه دبلوم  وخلص جيشه بالعافية … و للأسف عرف صاحبنا طريق الضياع

وبدأ بالبرشام والحشيش لحد الحقن والبودرة  ( ربنا يعافينا ) … طبعا طوب الارض من أهل وجيران ومعارف حاولوا مع صاحبنا ده يرجع عن اللى هو فيه ….لكن مفييييش فايدة …. حريف فى الكدب ولا شحاتة أبو كف فى الزمالك …مية مرة دخل مصحات و مستشفيات وراح لشيوخ بالكدب وكانت الناس بتتعاطف معاه وتديله يا عينى يروح المصحات يتعالج ….لكن مفيش فايدة …

أتعرف على بنت.. حبته إزاى و ليه معرفش ؟؟؟ أكيد هى شايفة فيه حاجة الكل مش شايفها ….. البنت دى أهلها طردوها لما عرفوا انها هتتجوز واحد زى ده …راحوا اتجوزوا فى القسم …اه والله فى القسم علشان محدش وافق يقفلهم فى جوازة …واجروا أوضة وعاشوا فيها …. كانت بتشتغل ليل نهار علشان تجيب حق وجبة ياكلوها هما الاثنين …وهو ماشى فى سكة الشم …ومش حاسس ……… خلفوا …. وهى  فرحانة أوى بالخلفة دى …..  مع الوقت طبعا بدأ يتعب ويمرض , وهى تروح تلف بيه على الدكاترة …جاله فيروس  ( وده نتيجة طبيعية لحالته ) … أبوها مات و ورثت منه شوية فلوس … الحال اتعدل معاهم وعاشو كويس …واشتروا شقة فى حتة مش أد كده يعنى …بس جابت عفش حلو وفرشت شقتها حلو….

وهو لسة مدمن مريض عاطل منبوذ من الكل …بس عندها هى الخديوى إسماعيل فى عزه ….

حالته الصحية بتسوء كل يوم عن الاول بسبب الحقن اللى بيضربها بلغة المجرمين … بدأ يتقيأ دم …و يتبول دم …مابيرضاش يروح المستشفيات علشان ما يتحجزش ….وهى شايفاه وحساه الامير هارى

ومازالوا عايشين سوا …. و مبسوطين ,  ولما تيجى تنصحها تقولك اهو يعيش الكام يوم اللى فضلنله زى ماهو عايز …يتبسط …ليه اعكنن عليه واضايقه …النهاردة هو معايا , بكرة هو مش معايا , وانا بحبه وعايزة ابسطه …. لدرجة أنها بقت هى اللى بتجبله المخدر وتديله الحقنة …

تعبى السرنجة و تديهاله علشان يتبسط …. وتنده على ابنها هاتلى يا واد السرنجة …

شفتوا بقى إحنا فين … الغلط صح , والمرض راحة , والادمان إنبساط ….

وكل ده بإسم الحب ….

كل واحد بيحدد مبادئه من وجهة نظره هو ….. نسيوا الصح والغلط والحلال والحرام ……

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Optimization WordPress Plugins & Solutions by W3 EDGE