.

.

فساد أم كسل من المسئولين

فساد أم كسل من المسئولين

كتب /مصطفى بن سلام
هذه شكوى مقدمة من سكان أبراج اغاخان متمنين أن تلقى اهتماما من المسئولين.
السيد محافظ القاهرة الفاضل / تحية طيبة و بعد
ممكن افهم وظيفة حضرتك ايه بالظبط ؟ و بالمرة اعرف وظيفة رؤساء الاحياء ؟
دي اغاخان في شبرا ، كانت منطقة راقية و هادية لحد ما فتح عندنا كذا كافيه حولوا المنطقة لمستنقع وساخة و بلطجة ، قدمت شكاوي مستمرة في الحي و في محافظة القاهرة و الشكاوي بتتحفظ ؟ هل من الصور دي حضرتك شايف انها كيدية مثلا علشان تتحفظ ؟ لما كل يوم خناقات و ضرب و تكسير و كاسيت شغال بأعلى صوت لحد الفجر و بلطجية و سرسجية و مسجلين خطر ملوا المنطقة و اقدم شكاوي انا و بعض الجيران و مفيش حاجة بتتغير دة يدل على ايه ؟ يدل على ان الفساد وصل للمحافظة مش للحي بس ، هل نوصل الشكوى لرئاسة الجمهورية بما ان حضراتكم بتاخدوا اوامركم و تشوفوا شغلكم بس بأوامر من الرئيس ، و لا فيه امل نلاقي استجابة للشكاوي المتعددة و تتقفل الكافيهات اللي كرهتنا في حياتنا !
ايه الصعب في قفل كافيهات شغالة بدون ترخيص و ملوثة للبيئة بالشيشة اللي بتقدمها و دخانها اللي عامينا ، و الطاولة و الدومينو اللي بينسمع صوتهم لحد الفجر و بنطلع كل يوم نتخانق بسببهم ، لازم يكون فيه قتيل علشان تتحركوا مثلا ؟
و لا نسيبنا من القانون و ناخد حقنا بأيدينا و نتحول لغابة طالما القانون بيقف عند الكافيهات و القهاوي و مبيتنفذش !
كافيه باباي في ٢ شارع الامل في ابراج اغاخان مش فاضله غير انه يقيم افراح علشان تبقى كملت ، و الكافيه اللي تحت عمارتنا و اللي كل كام يوم يغيروا اسمه في ١٠ شارع تفتيش الري اغاخان شبرا ، الكافيهين دول لازم يتقفلوا لان قريبا بسببهم هاتحصل جريمة و اللي عواقبها هاتكون سيئة عليكم و علينا .
اتمنى تحكموا ضمائركم ، و تفتكروا ان المناصب و الكراسي زائلة و ان العمر قصير و كلنا رايحين لرب العالمين و اننا هانختصمكم قدامه وقت لا ينفع ندم و لا شفاعة ، انتوا هاتتحاسبوا عننا امام الله و يا له من حساب عسير .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Optimization WordPress Plugins & Solutions by W3 EDGE