.

.

محمد شبارة يكتب: مين اللى غلبان

محمد شبارة يكتب: مين اللى غلبان

طالما إنت مصمم علي إبتزاز الدوله بكلمة “غلبان” يبقي لازم نعرف مين الغلبان اللي إنت تقصده وعامل متحدث رسمي باسمه وبتهاجمنا وبتهاجم الدوله علشانه !!
هل تقصد مثلاً بالغلبان سواق التاكسي اللي حاطط قدامه علبة السجاير المارلبورو وكل ماتخلص ينزل يجيب غيرها من أبتزاز الركاب والبلطجة عليهم في الأجرة !!
ولا تقصد سواق الميكروباص اللي بيجيب في اليوم بمبلغ وقدره ترامادول !!
ولا تقصد سواق التوكتوك اللي بيشتغل علشان يبرشم مش علشان بيصرف علي أهله زي مابتحاول تروج !!
ولا تقصد الموظف الحكومي اللي بيقبض فلوس من الدوله من غير مايشتغل والموظفه اللي بتروح الشغل تقمع باميه وتلف محشي ويعطلوا مصالح المواطنيين اللي بيقبضوا من الدوله علشان يخلصلوا مصالحهم !!
ولا تقصد الصنايعي سواء كان سباك أو حداد أو نجار أو ميكانيكي اللي علشان بس يصلحلك حاجه بسيطة عايز 500 جنيه ودايماً بتلاقي ستاتهم في محلات الجزارة ومحلات الفراخ بيشتروا كمية أكل تكفي عمارة بكامل سكانها !!
ولا تقصد البواب اللي واكل شارب نايم ببلاش ومش بيدفع نور ولا مياه ولا كهرباء وكل شغلته أنه يخلف في عيال ويزود عدد السكان !!
ولا تقصد السايس اللي بيقولك “أكسر كله يمين” وياخد قصاد الجمله دي 10 جنيه منك ومن غيرك !!
ولا تقصد اللي عمال يخلف بال 10 عيال وصحته تهد جبل ومش عايز يشتغل ولا ينتج وكل أنتاجه متركز في العيال اللي بيخلفهم ويرميهم للدوله تعالج وتعلم وتوظف ويضيق عليك عيشتك !!
ولا تقصد الشغاله اللي بتيجي تنضف الشقة وبتاخد في ساعتين 200 جنيه وتطلع علي شقه تانيه تاخد زيهم !!
ولا تقصد المتسول اللي في الشارع اللي لما بيتقبض عليه بيلاقوا معاه أكتر من ألف جنيه حصيلة يوم واحد من الشحاته !!
ولا تقصد الغارمات اللي بيجهزوا بناتهم ب30 طقم سرير و50 ملايه و20 لحاف وهما عارفين أنهم مش هيدفعوا وبالتالي الموضوع أسمه نصب مهما حاول البعض تجميل الأسم وتغليفه بلقب غارمات !!
وبالمناسبه كل دول واخدين أكتر من حقهم من الدوله من أول رغيف العيش أبو “شلن” مروراً بلبن الأطفال المدعم اللي بيتصرف للعيال اللي بيخلفوها وعلاج لفيروس سي ومساكن محترمة وحتي تسديد ديونهم !!
فلو حد يستحق التعاطف بجد فهو أحنا الطبقة اللي واقفين ورا بلدنا ومحدش فينا أشتكي واتنازلنا عن حاجات كتير علشان نحافظ علي بلدنا اللي عندنا أهم من أي حاجه مش الفئه اللي أتسببت بعشوائيتها في كتير من اللي أحنا بنعاني منه دلوقتي وبندفع تمنه !! ومع ذلك ناس بتقول عليهم غلابه رغم كل اللي أخدوه وبيقولوا علينا منتفعين رغم كل التنازلات اللي اتنازلنا عنها علشان بلدنا !!!
تعالى نحسبها مع بعض ونشوف لما تم رفع الشريحة الاخيرة لدعم البنزين ايه الّى هيحصل
شوف يا سيدى
كنت بتدفع 300 جم وبتاخد 44 لتر ، بعد رفع الدعم هدتفع 300 جم وهتاخد 38 لتر ، مخربتش الدنيا يعني .
المشكلة مش كبيرة
وخلي الدوله تقدر تقف علي رجليها ، واللي مش معاه تمن الخدمه ما ياخدهاش وكفايه سنكحه ولف فى الشوارع من غير لازمة.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Optimization WordPress Plugins & Solutions by W3 EDGE